謝霆鋒2018正式回歸樂壇 演唱會搞得成大家想聽咩歌？
撰文：李妍樺
出版：更新：
2018年最爆嘅事，莫過於喺叱咤聽到謝霆鋒重出樂壇唱歌，相信喺電視機前面嘅觀眾都相當振奮，因為Chef Nic終於唔再玩食物喇！而係認真拎住支結他唱歌，記得上年英皇搞演唱會，謝霆鋒居然唔係唱歌，竟然喺度煮麵！觀眾即刻嬲嬲豬，大鬧畀錢買演唱會係嚟聽歌，如果要睇你煮不如返屋企睇《12道鋒味》算啦。的確，大陸做綜藝真係好賺錢，除咗好多植入式廣告之外，因為內容入屋，通常出街之後會多好多工作機會，所以近年謝霆鋒冇咩點唱歌，主力搞個節目，嚟到今年已經係第4季，想聽佢開金口唱歌真係要等發夢嗰陣。
（謝霆鋒《鋒味》facebook圖片）
+4
不過機會嚟喇，叱咤搵到謝霆鋒連唱3首歌，分別係佢嘅飲歌《玉蝴蝶》、《活着VIVA》同埋新歌《有火》，淨係聽到《玉蝴蝶》個前奏都幾乎high爆全場，呢幾年樂隊抬頭，好似Supper Moment、ToNick喺各大頒獎禮都拎到重要獎項，點知謝霆鋒一句「年輕得碰著誰亦像威化般乾脆」，一下子完全蓋過晒佢哋風頭，「搖滾之父」終於返嚟喇！
謝霆鋒喺叱咤唱咗3首歌。（視覺中國）
+1
其實早係上年已經走漏咗啲風聲出嚟，佢自己都話打算喺2018年會放多啲時間喺音樂上面，又先後推出咗《異想天開》、《有火》呢兩隻新歌，雖然上年搞唔成演唱會，但今年2018開演唱會絕對不是夢！淨係聽《玉蝴蝶》同《活着VIVA》大家邊會夠喉啊，依家煲定霆鋒嘅歌就差唔多喇，如果畀大家揀，邊一隻係大家心水呢？《遊樂場》一定走唔甩，《非走不可》更加唔使講啦，仲有《愛後餘生》、《無聲仿有聲》、《壞習慣》、《罪人》……
其實只要佢肯開演唱會，唱咩歌相信大家都冇所謂，好想再睇多一次霆鋒掟結他。