MC Jin廣州開騷唔怕語言隔閡　英文Rap全場幾千人一樣勁High

早前以Hip Hop Man身份闖進中國Hip Hop圈，由零開始用陌生語言再次打出名堂的MC Jin今晚在廣州開騷，《I AM HIP HOP MAN巡迴說唱會》在廣州體育館舉行，全場座無虛席，幾千人一齊大叫「嘻哈是甚麼？甚麼是嘻哈？不管你主流或者你地下！」你都咪話唔震撼。

MC Jin身穿金色「戰袍」，在一班佩戴金色面具的dancer襯托下出場，打頭陣唱出《Hip Hop Man》，DJ一drop the beat全場立即歡呼四起，句句都識跟住唱。MC Jin唱一句「嘻哈是甚麼」，DJ鬼馬地停音樂，不過歌迷自動波接落去唱「甚麼是嘻哈」，用半首歌時間炒熱全場氣氛，Hip Hop Man呢個名的確唔係浪得虛名。

除了《Hip Hop Man》，MC Jin當然唱吓之前的作品照顧不同歌迷。歌迷一聽到《14:59》的作品，如：《Welcome To The Club》、《Like A Rock》、《Fan Email》等等一樣反應熱烈。所以話，Rap咩語言根本唔重要，最重要係言之有物同有料。

其實Rapper都有好多面，除了型格帶狠勁外，當然也有柔情一面，唱到囝囝Chance有份featuring的《Fatherly Advice》，MC Jin即刻一臉甜絲絲。當熒幕播出囝囝Chance的畫面，MC Jin坐到台邊化身小fans默默看著，他說：「呢個rapper真係好有前途㗎！唔係話賣花賺花香呀，啲歌詞佢自己寫㗎，我都要13歲先自己寫歌詞啦大佬！仲有一個星期我就可以見到佢喇！」