黃翊再上紅館兼有新歌唱　20年後再戰：覺得timing啱喇！

離開樂壇20年的黃翊近期因為《流行金曲50年》（前稱《流行金曲50強》）再次彈起，其演出片段亦在網上流傳，近日黃翊不時在Facebook分享Studio的相片，又貼上與星夢老闆何哲圖的合照，好多網民都期望黃翊復出。

《香港01》致電黃翊問到是否打算簽約星夢再圓歌手夢？黃翊笑言如果真的要簽約星夢，就不會公開Post相，而是等一切塵埃落定再作公布，又表示今次和何哲圖傾的「正嘢」，其實是討論暑假舉行的紅館騷：「聽聞因為節目收視好好，就打算將個節目搬到上紅館，佢哋話想搵我做嘉賓，個騷大概係8月左右，其實我第二次去節目錄影時，監製已經同我講過。」

黃翊第二次錄影應該是4月頭，和鄭俊弘與何雁詩爆出戀情的時間相近，當時一直有指鄭俊弘因事件失去上紅館的機會，其7月檔期先後傳過會由許廷鏗和吳若希接手。現在星夢打算開個「流行金曲50年演唱會」，雖然時間相差一個月，但也有可能就是解決紅館期問題的Plan B。

不過黃翊對於此事就不太清楚，更直言連有甚麼同台嘉賓都不清楚：「我冇問到，但知道會係出演過節目嘅歌手，其實我有得唱，對依啲都冇所謂。」在《流行金曲50年》中再次爆紅的歌手不少，包括兩位凍齡美男孫耀威和陳曉東、衛蘭等等，記者曾向孫耀威方面查詢，對方回覆未有收到邀請，到底到時有咩嘉賓呢？大家期待一下吧。

另外，黃翊表示正在錄製新歌，不過簽約方面就未有打算：「錄歌係進行中嘅，節目出街之後，好多人都想再聽我唱歌，我覺得timing啱喇，就搵咗啲朋友幫我。」黃翊自言已不在是十八廿二，知道有今次的機會好難得，所以行的每一步都會很謹慎：「都有幾間公司搵我，有啲都好有誠意，但我就出咗新歌先，睇下個反應點，再拎首歌去傾。」問到可會心思思想開個個唱？他亦坦言第一次上節目已收到邀請，但當時覺得未係時候，希望再睇準一點時間再出擊：「唔敢講住，做好眼前嘅嘢先，我又唔係好心急，都嘆凍咗20幾年喇。」