職場間的請客文化

新舊年交接絕對係破財時節，大量派對、交換禮物，仲要交稅同差餉。如果你係阿姐阿哥級就更大鑊：公司聖誕派對、自己組聖誕派對、冬至飯、開年飯、開工利是，仲未計有下屬轉工辭職要食farewell飯，請到新人又有welcome lunch……諗到都肉赤。
最灰係，出完錢，仲要比班細嘅怨。

公司的聖誕派對，各處鄉村各處例嘅，我分享吓自己經歷過的其中兩種：

  細公司：大家圍威喂叫兩盒薄餅、意粉，喺會議室食餐lunch就已經係慶祝咗，大家唔會有咩期望，所以無失望亦正常，食完就埋位等放工，亦好少有是非衍生。

  大公司：Admin/HR要專誠抽半日working hours去買抽獎禮物、中西日式食品、佈置會議室、send email邀請高層出席……而我覺得最搞笑係，有一封official email寫明，各老闆要夾幾多錢：

CEO ⋯⋯ $5000
Directors ⋯⋯ $3000
Managers ⋯⋯ $2000
Assistant Managers ⋯⋯ $1000

真係神枱嗰堆高層都算啦，但Managers同Assistant Managers其實真心灰，我同同事講：「咁樣出封email命令人夾錢都有嘅？」同事：「係咁架啦，搵得多無所謂。」吓，Assistant Managers可能只係多我地幾千蚊……

你以為只係拎一二千出嚟破財擋災？少年你太年輕了。

出錢慘：出完錢仲要俾人怨

全公司抽獎係一回事，經理A要請自己組同事慶祝又另一回事，一組計埋part time、intern十個人，飲茶千幾二千蚊少不免。點知返到公司，有下屬發現隔離組經理B請同事去食自助餐！經理A心諗乜玩咁大……B組同事仲要不斷高聲講生蠔有幾好食，本來A 組同事對隻糯米雞都幾滿意，但聽聽吓就覺得：「乜我地唔夠隔離組勤力咩，點解人地食得好咁多。」經理A收買人心的茶錢，就咁變成白付了。

唉，仲有新年派利是仲要拆完周圍講，聽到呢啲是非就覺得好煩，正當我諗住叫大家少啲怨嘅時候，朋友卻提醒我，怨，其實都分兩個層次：第一種純粹貪心想食免費好嘢；第二種係，個經理好乞人憎，我根本唔想同佢食飯，仲要食得差！

有得食又慘：陪笑仲要背脊骨落

佢仲同我分享咗個故事，曾經有個老闆，對所有人都好衰，永遠見人就鬧，大家無咩事都唔會同佢有眼神接觸。有日佢心血來潮話要請食飯，全組無人想去！但當然都要去……重點係，當時係朝早9:30，都未餓，佢話要飲早茶，間酒樓仲要10點前無午市點心，大家可以食炒飯、炒粉、炒米，同埋各類包包包包包！乞人憎老闆就好興奮咁叫咗叉燒包、奶黃包、糯米卷……各同事當然係你眼望我眼，同埋枱底whatsapp夾好，等10點有點心就叫蝦餃燒賣腸粉粉果。

終於等到10點，同事一號立即彈起去拎點心紙，點知老闆等佢畫完張紙準備交之際，截住！仲話：「成枱都係嘢，你地都食唔哂，仲叫其他？」全枱人都估唔到佢有此一著，睇見堆包山就無胃口，唯有話係呀，包包包….飽呀…飽…就係咁，大家晨早流流食咗一堆包，就帶住怨氣開工。

然後lunch time，老闆竟然同同事們講：「大家今日個lunch time調咗去朝早，一日唔應該放兩次飯喎。你地今朝食得咁飽，食剩咁多嘢，而家應該唔餓啦？」眾同事完全唔知咩事，無啦啦一日中兩次伏，怨聲載道。

所以，各位阿姐阿哥，收買人心係學問，唔係你諗得咁簡單，平時對人差，幾個麵包真係補唔返；相反，如果老闆平時對你都唔錯，開工利是細封少少都應該感恩體諒，畢竟家家有本難唸的經……唉，話時話你交咗稅未？

（本文純屬作者意見，不代表香港01立場。）