【新年集體回憶】派財神：那些年的紅色勒索案
求大家畀機會佢嘅新任「財爺」唔意外咁再畀人翻佢舊史，話說當年仲係小小波嘅佢，眼中原來只有錢，去公廁途中有人用一毫子引誘佢幫手帶白粉，佢當刻就應承咗，「為五斗米折腰」。
講起為五斗米折腰，我都試過，可惜無司長咁有勇氣去走粉，只係斗膽喺大時大節，攞住張紙仔去人哋屋企公然恐嚇勒索啫。有番咁上下年紀又住過喺公屋嘅看倌，一定知道我講緊嘅係乜嘢「非法勾當」。
無錯，就係一年一度新正頭嘅細路派財神。
後生仔或者唔明財神可以點派。其實所謂財神，只係一張寫咗「財神」兩隻字嘅紅紙，大約兩三吋閣一吋高啦。咁話就叫做「派」財神，實際上點會咁好免費益你，被選中嘅細路們逐家逐戶拍門，一邊高叫「財神到」，一邊其實半推半就強迫人哋科水，買呢張當時成本五毫都唔使嘅紅紙仔。
最初，即係得果五六七八歲果陣，我都只係其中一名受害人。大年初一大概由十一點開始，平均每兩個鐘就會有人拍門，跟手我阿婆叫我開門，一位哥哥仔就會嗌財神，然後阿婆就會送上利是一封，再將果張紅紙攝入去雪櫃頂棵細桔樹度。然後到年初二開年，棵樹上面有成六七張紅紙，算係佈置咗棵「中式聖誕樹」。
人大就自然壞，喺一個品流複雜嘅地方，難免好似波叔咁會遇人不淑，喺球場群埋咗一班唔知係咪真係有黑底嘅童黨，受害人就變成加害者，到咗初三赤口（係，因為個人壞唔哂，初一二仲係留喺屋企），就分別喺鄰近嘅公屋到派財神。
雖然只係柴娃娃求財，但係我哋無粗製濫造。搵咗位年紀大少少嘅哥仔，用毛筆親手寫財神兩隻字，而唔係好似某啲團體咁買嗰隻大量印刷嘅財神小揮春，而阿哥仔手字又的確唔錯，寫足千幾張都唔見有走樣，所以佢唔使出去「跑數」，坐係度等分紅就得。
至於我，雖然係首次上陣，但係完全係無懼嘅！用今日最新嘅政治公關術嚟講，我係深信自己係「財神派我嚟賜福」，多年旁觀經驗亦都唔係浪費嘅，何況「財神」送上門，中國人咁愛呢種迷信，無理由趕佢走㗎嘛？
結果？雖然無咗頭啖湯，但係因為赤口無咩人拜年，又無咩「行家」同日爭食，反而殺出條血路。仲記得去到其中一個阿姑屋企，阿姑話：「赤口呀，同人講嘢會成年惹是非。」天真無邪嘅我回答：「係呀，咁但係都開咗口囉，封番個利是沖沖喜啦！」又畀我過到骨。
最後彩池有幾多真係唔多記得，咁畀啲大哥攞咗大部份（事後就明白唔係無行家揀初三，係個地盤唔容許佢哋出現啫），淨返嘅，好似都有幾百蚊，算唔錯㗎喇！你諗下，利是即係強積金，俾你父母吸咗去話「大個先畀返你」，即係無哂，俾佢哋對沖哂辦年貨同派利是嘅成本，現金，梗係最真心。
人大多兩年，勒索技術就當然有升級，就係跟住班疑似大哥去上門舞獅。呢個都係公屋另一新年特色啦，走廊尾聽到鑼鼓聲，唔少人會拿拿臨關上大門扮唔喺屋企，然後一大隊人圍住隻舞獅去拍門，咁唔少老人家又係貪個意頭，最後都係打開門封番封利是，隻獅就跟手鑼鼓起照例FING兩FING個頭鞠個躬就走。
喂，係咁HEA架啦，唔通上個木人樁採個青畀你咩？
我都係近幾年先知，舞獅、舞龍定舞麒麟撞人，原來都要按警務處處長所發嘅許可證條件進行，呢單嘢真係犯法㗎……而經過事實證明，做財神嘅小艇仔，其實係好搵過團隊謀財嘅。
一來，一封利是成十幾個人分，每人分得雞碎咁多；二來，又FING又打鼓又叫，個體力付出大好多；三來成個流程太張揚，好多人會縮係屋企扮無人係度，你個體戶派財神，拍門嗰下仲可以扮係親朋戚友拜年，咁大隻獅點好？而更甚係，第一次出EVENT偏偏撞正「行家」，初則口角差啲動武，畀啲神秘嘅「叔父輩」叫停咗個活動。
之後，再無住喺公屋，呢啲活動都日漸息微。時移世易啦，宜家公屋啲保安咁好，個個大門口都有度大閘，拜年就話啫，邊畀你上門派財神；有部份屋村保安本身都惡過鬼，以為自己套制服係軍服咁濟，當然更重要嘅係，多咗小朋友家境唔錯，唔使為左一百幾十拋個身出嚟，佢買件潮T都唔止呢個價啦。
我哋成日講集體回憶，諗番轉頭，好多事原來都係源自「窮」同「唔怕死」，玩沙炮（放入褲襠喎）、煲爉（你試過煲WD40未?）、後山放穿雲箭滴滴金（唔明就算）之類，就係因為夠哂「驚喜」，就算公屋都拆埋重建，都唔會唔記得呢啲過時過節獨有嘅香港有趣特色。
話題扯遠咗，最後，雞年謹祝各位讀者鴻運當頭，財神自己送上門唔使接！
（文章純屬作者意見，不代表香港01立場。）