張敬軒被騙徒利用AI換面製作呃錢片：成件事係細思極恐
撰文：吳子生
出版：更新：
張敬軒（軒公）今日（25/3）現身中環出席粉絲浪漫約會活動。提到最近有騙徒利用AI deep fake的換面技術及AI 摸仿聲音軟體，將他的肖像製作假新聞短片之外，亦製作虛假的應用程式藉此騙財。
軒公今日同粉絲浪漫約會。（梁碧玲攝）
軒公接受《香港01》訪問時表示：「我覺得成件事係細思極恐，我聽嗰條片係澳洲口音，而我就諗我啲圍頭話口音點解會冇晒。佢哋係用AI分析咗我把聲配埋個口型，真係好恐怖。（會唔會提媽咪小心啲，如果有人話係自己唔好信？）我阿媽連我都唔信，哈哈，你放心。而我都有同我啲粉絲講，提佢哋要小心，講明我唔會喺IG私底下DM佢哋，亦唔會話要籌款整歌，啲騙徒都係嗰幾招，我心諗你唔知我老闆係邊個，哈哈。」
騙徒利用軒公肖像犯案。（梁碧玲攝）
軒仔透露身邊有朋友因此不幸中招，損失巨額金錢：「我知道個金額都大，以前對於呢啲假用戶諗住唔會有人上當，但直至到開始有啲歌迷受到呢啲嘅滋擾，又或者有一啲損失，我哋就即刻行動出聲明，同時亦同一啲網絡公司，全網去搵呢一啲AI片，我唔想再有人因為我蒙受損失，明白到呢種手法已變成犯罪工具，亦變成趨勢，我唔係第一個，亦唔係最後一個。」