麥明詩自爆邀李龍基出席婚宴原因　𠱁四大長老開心搞足三場極孝順

「十優港姐」麥明詩（Louisa）與盛勁為在上個月底舉辦了三場婚宴，場面盛大各有特色。今日麥明詩在Instagram曬出婚禮照，分享搞足三場心得，並自爆邀請李龍基原因。

麥明詩文中稱，首場圍村婚宴主角是老爺奶奶，並邀請奶奶偶像李龍基助慶。第二場是麥明詩父母，菜式、婚紗款均迎合他們喜好；第三場則是麥明詩及盛勁為，以後生仔喜愛的瘋狂派對為主。

麥明詩表示，此安排成功令四大長老及一對新人都開開心心，「幫我地避免咗唔少衝突。男女家唔使爭圍數、長輩和後輩唔使爭論食物和形式係中式定西式；頭兩場我和盛生安分守己地做好兒子和女兒的本分，再於尾場玩得好盡興（盡興到啲相都唔出得街)。咁壞處就係… 真係好攰」。麥明詩不忘再賣口乖讚長輩都很隨和，「我爸爸媽媽、老爺奶奶也是非常隨和，我們非常幸運，而最後似乎各人都開心。」她最後幽默指：「家人話『冇咩所謂，簡簡單單就OK』呢句說話… ummm.. 千祈唔好盡信呀」。新婚夫盛勁為亦留言放閃力撐太太，「真！長老講『結婚簡簡單單得啦』一定係大話嚟！完全同意！」