愛回家又走一員! 肌肉男「CPU」譚坤倫發長文宣布離巢北上發展
TVB的處境劇《愛·回家之開心速遞》又走一員!昨日(21日)《愛·回家》中的「CPU」譚坤倫在社交平台發長文說:「TVB再見了,謝謝13年來的支持,稍后北京見。」譚坤倫於2011年以《功夫新星》這個節目加入TVB,之後參演的劇集多為跑龍套,他直至於《愛·回家》中飾演IT人CPU而為人認知,早前他更為劇集操肌變大隻而被網民大讚及留意,但最後他選擇離開TVB外出發展,不少網民都感到可惜。不少曾經與譚坤倫合作的演員都有留言為他打氣,亦有已經離巢的藝人留言表示「恭喜」。
譚坤倫的全文如下:
首先要多謝攪出《功夫新星》呢個節目嘅所有人,令到我好衝動咁參加咗,從而進入咗呢個行業。過咗非常精彩嘅13年,訓練班畢業之後,多謝監製潘嘉德先生,令我可以參與On call 36小時2、拆局專家、醋娘子、流氓皇帝、三個女人一個”因”。
然後要多謝莊偉健監製嘅信任,令到我可以參與《天命》呢套劇集,第一次有感情線,以及有機會展露我嘅三腳貓功夫。然後再多謝監製同埋導演嘅堅持之下,我先再有機會參與《包青天之再起風雲》,雖然經歷咗一個相當辛苦嘅拍攝過程,但令我得到非常難得嘅回憶。
可以參與兩位金牌監製嘅劇集,真係會好開心,因為細個嘅時候,就睇過佢哋製作嘅《尋秦記》、《衝上雲霄》。
然後兩位監製離開TVB之後,我經歷咗好長時間嘅”失業”,之後就要多謝監製陳耀全、方駿釗,俾我參與咗好多套劇集。
2018年多謝一位副導演,搵我做IT狗,其實好耐之前我就好想加入開心速遞,呢套劇集幫左我好多,令到一個內向嘅我,慢慢打開自己,尋找演員嘅自我創作,然後得到觀眾嘅笑聲,慢慢增加咗我嘅自信心。然後多謝珍姐,監製林建祥,俾咗更多演出機會我哋,亦都好多謝編劇知道我鍾意健身,寫咗個腹肌IT男出黎,令到我終於終於有感情線,我對唔住Gigi,要你再發掘下一個腹肌男🙂
仲要多謝TVB呢個大家庭,無論幕前幕後,未能一一多謝嘅人,你哋都會在我心中,能與你哋一齊捱更抵夜,日曬雨淋,好多精彩嘅回憶。
多謝你哋嘅照顧,包容,教導,提攜。
仲要多謝好多記者,估唔到當時為咗拍攝腹肌需要斷食,會有咁多報道,令到我有咁多人留意到。
多謝我嘅fans,你哋咁多年一直依然到場支持,實在榮幸!
我依然會繼續一直係呢個行業發展,歡迎大家揾我合作🤟🏻
各位江湖再見!