Lucy中腺病毒發高燒流鼻涕 李璨琛太太：佢咳到肺癆咁
撰文：林得懿
出版：更新：
李璨琛兩位寶貝女先後生病，最忙嘅一定係李老母。（IG圖片）
李璨琛兩個寶貝女李元元（Lucy）和李斐斐（Sucy）近日先後病倒，Lucy媽梁志瑩今日凌晨於限時動態發文，透露妹妹疑似被家姐李元元傳染腺病毒：「最近心好累，家姐之前腺病毒搞5咗成個幾禮拜，好番冇耐，又突然間發高燒流鼻涕，今日又咳到肺癆咁，然後阿妹琴（噚）日又突然間發高燒，跟住今日又發現佢有好多眼膠，然後我發現佢應該都係中咗腺病毒，我今日就係不停幫阿妹抹眼屎搽精油叫家姐食中藥，無限輪迴。#小朋友病真係慘過自己病 #徘徊在客服梁與護士梁之間」
病到生意失敗咁款嘅Lucy。（IG圖片）
Lucy媽今日分享Lucy嘅照片，只見平日十分精靈嘅Lucy「大」字形攤在軟墊上，連眼袋都出埋嚟。Lucy媽亦表示：「一睇就知佢琴日經歷咗好多」之後亦在限動感謝大家集氣，又指自己平時好少會呻：「我琴晚臨瞓前許咗個願，我話寧願我病，唔該我兩個女好返，今朝肥Lu起身竟然無咳過，當然佢係呆嘅，但起碼冇再咳先啦！至於阿妹眼屎係有嘅，但起碼佢冇再發燒先啦，而我，又真係願望成真嘅，我一起身喉嚨痛！仲有好多事情要做！係唔可以病㗎。」