方力申唔浪漫因父母遺傳　冇時間識女仔關前任事︰拍咗鬼死咁多年

今晚（27日）一集《玲玲有情報》以「從今開始該好好戀愛」為題，並搵嚟方力申做嘉賓。對於被外界認為花心、多女朋友代表，方力申都未解釋，玲玲師傅已為好友平反。「因為你靚仔、識運動、單身無結過 3、5、7 次婚,人哋會覺得你有問題。」她形容小方男歡女愛模式，仍停留在古代。「同佢講嗰個(女仔)幾好，你約佢出嚟食飯啦。佢都會拒絕,話驚人誤會。」

方力申仲話同異性單獨約會食飯次數唔多過 5 次，佢解釋自小練習游水，細個拍拖不敢太張揚。「驚畀啲家長話你咁細個拍拖，之後就由游水即刻跳入行，又要保護形象，一拍嗰個又拍咗鬼死咁多年，根本都無時間約會其他女仔。同埋如果我唔夠鍾意一個人，係唔會開始，分手好煩、好辛苦。」小方又話唔浪漫性格同家族遺傳有關，因為從小到大都無見過父母手拖手出街。「所以你從來無見過我放閃、唔會影到張相我喺街拖住女朋友呀。」