嚴重降雪都要外賣PIZZA?北海道用馴鹿送上門!

撰文:
最後更新日期:

冰天雪地要食PIZZA唔通真係靠佢?(官方影片截圖)

今年東京久違了54年的11月初雪,早到得令人又驚又喜,一條又一條港式News Feed洗版報導,自問睇到煩厭。查實日本落雪影響交通,增加通勤通學時間,加上融雪令路面濕滑,我就試過用三倍時間,行一段十分鐘的路程,再於月台上迫滿人等待三小時,靜靜打道回府。

但說到被大雪影響最深的,點都會數到北海道,10月已經初雪,加上日本氣象廳宣布「ラニーニャ現象」(拉尼娜現象)正在發生,意味着寒冬將會更嚴峻更漫長,市民的人衣食住行都應該大受影響。其中日本的Domino's Pizza可說看準需求,望於12月推出Snow Delivery服務,以馴鹿運送外賣,現在已進入最後測驗階段,更於網站不停更新進度,但卻換得網民大斥不人道。

張宣傳圖整到鬼咁靚,呢啲真係FF喇。(官方宣傳圖片)

據Domino「降雪Delivery對策室」表示,馴鹿以外,都有考慮過購入4WD四驅車或雪地電單車來應對,以減少寒冬影響而捐失的生意額,但為何最終由馴鹿跑出?預定的20隻馴鹿由北海道牧場養飼及訓練,每頭約30萬日圓,只是四驅車的零頭價錢。加上不用駕駛執照、最高時速可達每小時80公里,加上寒冬限定,話題性、宣傳效果十足,想到客人懷住緊張心情等待馴鹿來到門口,講講下,感覺是圓了那個聖誕老人夢。

但消息一出,已有日本網民斥Domino's此方案不可能實現,難以控制之餘,利用動物營商為不人道行為。不過站在顧客立場的我,聽落覺得有趣,更不期然聯想到多前年大熱迪士尼動畫《冰雪奇緣》中的情節於眼前實現,禁不住興奮起來。

咪以為要馴服隻馴鹿真係咁易。(官方影片截圖)

Domino's於11月24再於網站上載新消息,馴鹿們已於北海道某駕駛學院中開始實地測試,片段中可看到研發人員手忙腳亂考慮將外賣包綁到馴鹿身上,又或是拖拉雪橇。Domino's亦坦言是次方案面對穩定性及安全性等問題,如中途遇到其他小動物,會否影響馴鹿工作等等。反而我比較擔心運用人員,雖說不用駕駛執照,但控制動物應比汽車難度畢竟更高,而且到現階段仍未決定運用人員是用自己雙腳還是借用馴鹿來行走,無論怎樣,到頭來辛苦的,可能都是這一班前線員工。

講開又講,原來Domino's Pizza今年8月起已於紐西蘭實行DomiCopter服務,以小型直升機送外賣,客人只要於後花園收件即可,以加快運送時間的同時,減少人手費用。雖然限制極多 (天黑送唔到,天氣差送唔到,無後花園都可能有難度),但話題性十足,開拓空中Delivery新市場。

(文章純屬作者意見,不代表香港01立場。)


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。