【廢青求職攻略】最差的見工技巧：「只被問而不發問」
今篇繼續分享盡量喺見工時避開中伏機會，但我必須再三強調，應徵者可以問多幾句，而重點係要有禮貌、尊重對方、保持微笑地問，正所謂「態度決定高度」，否則你搭車去見工都只有運吉，而無可能做到上一篇所講「有幾個offer喺手」。
睇親啲關於見工嘅文章，都係寫「求職者應該點點點讓僱主留下好印象」，呢啲文唔係無道理，不過我想由打工仔角度去分享見工呢回事。
係，我係對你個招聘廣告有興趣，所以send信過嚟，但個廣告同事實有幾符合？大部分打工仔都心照。最少個廣告唔會寫「你有一個唔放工的上司」、「你老闆極迷信，會以八字安排座位」或「你team有個A字膊同事」等等，所以，應徵者都應該打醒十二分精神，盡量觀察清楚，令自己唔會又後悔幾年。
把握「你有無問題問我？」
Interview過程中，對方毫不客氣將你份CV由頭問到尾，再由尾問返上頭，到最後多數都會問一句：「你有無問題問我？」老虎蟹都要答有！我會盡情問，都係嗰句，就算你唔請我，我都知多咗唔同公司嘅運作／組內分工，然後再自行分析邊啲係值得參考、邊啲廢，第時做嘢就可以擇善從之，搭車都要錢，一場嚟到點解唔袋啲嘢走？
問咩好？
「一team有幾多人？點樣分工？」
曾經我寫過，年少無知嘅時候入咗一間公司要我日日曬太陽，間嘢除咗依據時辰八字安排座位之外，喺同事人數上都有伏嘅成份。見工話平時做嘢會分幾team，點知入到去，全公司得三個人！喂，每半個人一team呀？自此我學精了，每次見工都一定問究竟有幾多人會同我一齊捱？OT係預咗，但孤軍的感覺太痛苦，諗到夜晚OT要一個人隊杯麵就想喊啦，如果一班人一齊留夜食就唔同，一齊講粗口、繼續齊齊做，感覺好好多的。工時長，見同事多過見老公，所以一條team嘅組合太重要。
當初年少無知，被人呃過一次，佢答我：
「我哋而家一路請緊人，齊team會有十個八個。」
點知我入職之後，得三個，係全公司得三個！
問佢幾時請人，一時話未有時間、一時話未有適合CV、又話請完我無哂budget（我一個人點用哂你十個八個人budget？），總之係騙案。自此之後我唔會接受一啲咁空泛嘅答案，十個就十個、八個就八個，「十個八個」即係十個定八個？我一定會問到底。
曾經有朋友話佢會問：「上手點解辭職？」我覺得咁樣實在過份直接，當然對方唔會答，仲要有好多借口耍走你例如「呢啲係佢私隱，我唔方便答。」咁就已經KO你。再諗諗，就算佢答，個答案都未必可信，因為你唔會搵得返阿上手出嚟問，即使你哋有交接，佢人之將走，都好嚟好去夾哂口供，真相要到你中伏先出現。
但我會問：「上手做咗幾耐？」Interviewer聽落去舒服啲，戒心都低啲，如果答案係兩三年或以上，咁你都放心啲，份工伏極有限。如果係一年或更少，你亦唔需要講嘢，露出一個驚訝眼神，對方自動會講埋落去，懶係解釋咁。因為佢都會驚嚇親人請唔到人做嘢的，啲嘢無人做，佢慘過你。
返工講經驗，見工都係，當你見多幾次，問多幾次，自然知道對方講真定講假。想再穩陣啲？其實我仲有一個絕招，不過就有啲代價，唔係人人敢試，下篇再講。
（文章純屬作者意見，不代表香港01立場。）