【詭探.劇評】賴「無Budget」?劇情粗疏,浪費演員題材

撰文:
最後更新日期:

《詭探》可以話係各位新台支持者所期待嘅一套劇,牌面有邵仲衡、蔣祖曼、尹揚明、車保羅,大家都寄望新台可以繼《瑪嘉烈與大衛系列: 綠豆》之後有套劇可以睇吓威吓。不過「愈期待愈怕受傷害」,喺我Facebook專頁嗰邊做嘅調查顯示,截至7月10日,有畀反應嘅155個觀眾覺得大結局「差咗啲」嘅有32.26%(50 票)、「普普通通」有15.48%票(24)、「好差囉」嘅有9.68%(15票)、「唔錯啦」同「好好睇」嘅各有6.45%(10票)。可以見到《詭探》同大家所期待嘅落差都幾大。
 
單元結尾草草了事

一劇之本,就講劇本,其實最出事真係個劇本。 用香港都巿傳說做題材,做神怪劇,以為佢一定冇死喇,因為神怪劇唔使合理,編劇少咗好多功夫,只要喺劇情上面將啲已有嘅都巿傳說元素串埋一齊,理順返佢。故事順序係「鐵路廣告」、「公屋落咒」、「西貢結界」、「高街鬼屋」,個個都耳熟能詳,寫仔細少少,人物關係刻劃多少少,已經好好。

《詭探》以香港都巿傳說為題材。(網上截圖)

為第二季鋪排犧牲結局

不過好可惜,最後大家所期待嘅茅山同門師兄弟互鬥、邪教入侵政府搗亂香港、茅山制伏降頭師、大破結界,統統有鋪伏線但每次去到最尾都草草了事,鬥法場面除咗打邪教嗰吓有少少睇頭之外,統統都係水準之下。而個結局更加係出事,根本唔係結局嚟,而係第二季嘅預告。難為一班演員出行力咁做,都無補於事。楊偲泳憑住「神婆」呢個角色嘅喊戲彈出,如果個劇本好少少角色情節立體啲,一定可以更爆。尹揚明直頭係浪費咗佢,行行企企,乜都冇做過。

楊偲泳飾演「神婆」。(電視劇照)

不能全然諉過於「無Budget

故事創作以及編審之一嘅作者王貽興,最近就喺自己其中一個報紙專欄自白,話因為種種原因,監製話畀佢哋知個劇情要改動,本來預咗有嘅茅山師兄弟鬥法、掌門玉璽點樣影響香港嘅龍脈氣數,全部都唔見晒。最大條橋冇咗,加上編劇們明顯技巧不足,全套劇散晒。

王貽興提到要改劇本嘅其中一個原因,係budget有限,呢方面絕對係監製問題。身為監製,你有責任睇住盤數,無論係你自己爭取開神怪劇,定係公司要開,你都要話畀金主知神怪劇要有特技CG、各式古怪道具、服裝,全部都係錢,開支一定多過都巿愛情劇好多。如果冇錢,一係唔好開,一係就度掂個劇本睇吓點走位。點都唔可以搞到依家開咗個頭,拍拍吓先話要改個尾。唔係話一定會失敗,但好明顯依家就係功力未夠。王貽興做咗個比喻,話明明係海底撈月都變咗雞糊。我就話根本雞糊都唔係,係食詐糊,只係大家都畀你過骨。

神怪劇要有特技CG、各式古怪道具、服裝,全部都是錢……(電視劇截圖)

消耗觀眾支持包容 愈來愈難行

請問有邊個觀眾唔係睇完每一集都覺得失望,但係畀足29次機會,一直睇到大結局?喺眾多媒體落力催谷之下,《詭探》先至有啲虛火,依家就話要開第二季。我希望ViuTV真係要望清楚,唔係《詭探》質素合格,而係大家都畀咗十萬個包容呢套劇。我真係好失望,恨鐵不成鋼。畀着呢套劇喺大台播,一早畀人剷到上天花板。

我唔知大家對新台嘅包容仲可以維持幾耐,我就仲有啲。希望佢哋可以改善普遍都有嘅「題材好,製作差」問題。尤其是依家開咗星期一至五橫線播放時間,唔似以前一個星期先見同一個節目一兩次,依家冇時間畀觀眾回氣,如果唔好睇,反感度好容易日日累積。嚟緊接《詭探》棒嘅《瑪嘉烈與大衛系列:前度》仲要孭住《綠豆》珠玉在前嘅包袱,鎮台之寶系列如果都不敵對台連聲都冇嘅《賭城群英會》,以後新台嘅聲勢只會更加差。

《瑪嘉烈與大衛系列:前度》仲要孭住《綠豆》珠玉在前的包袱。(《瑪嘉烈與大衛系列:前度》宣傳海報)

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。