【周星馳.來稿】喜劇之王:就算是尹天仇都不錯

撰文:
最後更新日期:

文:力高

周星馳咁多套戲之中,真係特別鍾意喜劇之王。

記得細細個跟屋企人入戲院睇,最深刻就係一開畫,幾個扮鬼嘅茄喱啡在鏡頭前左右掠過。

令我一直都以為,呢場就係開畫嘅第一幕。

直到大個咗重睇,先知原來第一幕,係尹天仇背對鏡頭,面向大海,穿着一如既往的灰色套裝,

大喊 : 「努力,奮鬥。」

自從發現咗有呢一幕,尹天仇的這個大喊就漸漸喺我腦海留下好深刻嘅回響。一個會叫自己加油嘅人,就算最後還是一事無成,還是值得敬佩。

雖然喜劇之王叫喜劇之王,但我覺得都幾黑色幽默,有人話呢套嘢係周星馳嘅自白,我無咩意見,反而只純粹覺得呢套戲係一個自嘲的故事。

尹天仇對做戲嘅執著同熱愛,一直都用一個最有修養嘅方式看待。

為自己不斷爭取機會的同時,亦不斷遭受別人的嘲弄與否定。

但整個過程,都無怨天尤人,即使佢滿口戲劇理論,但被人趕出場地時,從來無埋怨或質疑過對方的判斷。最多,都只係想拎返屬於自己應得嘅飯盒。

故事起承轉合,我覺得個「起」,係由柳飄飄出現開始。

因為佢哋相遇之前,都只不過係以不平淡的方式去交待尹天仇平淡的日常。

直至柳飄飄出現,成個故事就開始變得有血有淚,而尹天仇嘅人生都起咗變化。

柳飄飄,係尹天仇第一個觀眾,亦都係第一個由內到外欣賞尹天仇嘅人。

一生人之中,自己都未必識欣賞自己,但係居然能夠遇上一個會徹頭徹尾欣賞你嘅人,係一件幾咁難能可貴嘅事。

最感動我嗰一幕,唔係尹天仇同柳飄飄講:「我養你呀」

而係佢哋兩個坐喺海邊,一齊望著個大海,尹天仇用力攬緊柳飄飄,好用力地講咗兩次:「多謝」

我覺得,兩次多謝,係有唔同意思。

第一次視佢為觀眾,多謝佢捧場。第二次視佢為女人,多謝佢欣賞自己。

能夠遇到一個相惜相知嘅人,真係比遇到一個伯樂仲難。

尹天仇每日都努力奮鬥,直到有一天終於出現第一位支持自己的觀眾。

嗰種感激,比起多謝兩隻字,那一下緊緊的擁抱表達得更有力。

雖然尹天仇在外人眼裡,可能係一無事處。但佢對演戲及做人的耐性與修為,比一般人都高。

踏實爭取,即使不被人認同,機會一一流失,

都不頹廢不厭世,依然會因為見呀婆畀人呃而覺得憐憫,自己拎錢畀返呀婆。

輸掉任何東西都好,都不輸掉做人的態度。

雖然被評沒有演技,卻也不輸掉作為一個演員的專業,因為茄喱啡都要演技架!

我想,一生人為理想為生活奮鬥,最後就算得不到半點成就,只要能夠遇上一個懂得欣賞自己的人,都已經賺晒啦。

(本文為投稿,稿件可電郵至iwanttovoice@hk01.com;文章純屬作者意見,不代表香港01立場。)


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。