【TVB.博評】空有演技冇得發揮:在大台的金燕玲與惠英紅

撰文:
最後更新日期:

今屆電影金像獎塵埃落定,電視迷如我,最開心梗係見到林家棟捱出頭,憑《樹大招風》得到影帝殊榮。林家棟嘅心路歷程、喺大台嘅歲月,攞獎之後幾日大家都已經不停回帶,亦都有報道講到劉德華點撐佢,真係睇到好感動。

不過今次我想講嘅係影后惠英紅,同埋連續拎咗兩年最佳女配角嘅金燕玲。

金燕玲和惠英紅分別奪得今屆金像獎最佳女配角和影后。(符祥定攝)

大年紀就要做綠葉

香港電視觀眾近年對金燕玲嘅印象,要數到佢喺大台嘅處境劇 《同事三分親》、《畢打自己人》,仲有神劇《天與地》。不過金燕玲喺劇裏面一啲都唔亮眼,亦都冇得發揮咁濟,全部都係清一式擺起個款嘅強勢女人。《天與地》就好啲,做邵美琪家姐Brenda,同林保怡有對手戲,叫做對劇情有大啲嘅影響,但都只係做第三女主角。(1982、83年原來都幫大台拍過兩套劇,但我未睇過)

惠英紅就由1980年代尾開始,一直都有拍無綫劇,但一路都冇女主角做。令我最深刻嘅係《創世紀》做馬德鐘嘅老婆,已經算係最有發揮嘅一次。直至到王維基嘅香港電視拍劇,惠英紅先喺《我阿媽係黑玫瑰》做女一(咁啱同《幸運是我》一樣拍住陳家樂)。不過港視失落電視牌照,而《我阿媽係黑玫瑰》唔係當時力谷嘅劇集,我估好多人都未睇過。

直至香港電視拍劇,惠英紅才有機會在《我阿媽係黑玫瑰》當「女一」。(劇集宣傳海報)

有演技冇角色發揮

講咗咁耐,其實想歸納一句:大台走寶。金燕玲喺2007年返大台拍《同事三分親》時,已經係兩屆金像獎最佳女配角、一屆金馬獎最佳女配角,演技有肯定,但都冇戲分發揮。惠英紅係第一屆金像影后,雖然當年係憑武打片奪后冠,但淨係睇《創世紀》裡面求馬德鐘救返個囝嘅一段戲,其實都有《心魔》、《幸運是我》嘅影子,根本係好戲,但就要去到王維基2015年開劇,佢先可以做到女主角。點解呢?我覺得絕大部分係因為年紀問題。

邀約老戲骨拍戲

2007年金燕玲拍《同事三分親》時係53歲。惠英紅拍1999至2000年《創世紀》差唔多40歲。當年就係冇機會畀呢啲年紀嘅藝人發揮,十個有九個都做綠葉。除非你係超級一綫星好似汪明荃、黃淑儀、李司棋咁,先有機會繼續擔正做女主角。

金燕玲當時雖已曾多次奪獎,但在《同事三分親》中仍只能當綠葉角色。(劇集宣傳海報)

不過到咗2017年嘅今日,52歲羅霖、47歲陳慧珊、46歲江美儀、46歲陳松伶、44歲蔡少芬、44歲陳煒、40歲田蕊妮,全部都可以做女主角,啲劇排住陸續上。有人話呢啲係電視界老化嘅現象,我又唔完全同意。劇種、演員年齡層愈多愈廣,咁先可以滿足到唔同嘅觀眾。當然各種劇都要適量啦,年紀稍長嘅要畀機會,超級資深演員如修哥、羅蘭姐一樣可以擔大旗,春青逼人嘅就開啲青春劇畀佢哋發揮。

講到尾,都只可以講句時勢做英雄,唔恨得咁多。但係我深信好演員不受年紀所限,有時有人生閱歷嘅話,演技會更上一層樓。希望無綫、ViuTV、奇妙都可以畀多啲機會一班年紀唔係十八廿二嘅女演員做女主角。人哋Fox已經「慧眼識英紅」搵咗惠英紅拍劇,本地電視台可唔可以都快手少少呢?

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。