【來稿】小朋友話大個要做YouTuber 作為教師我都唔知同佢講咩好

撰文:
最後更新日期:

文:陳銳

今日我帶小朋友落操場上體育堂嘅時候,唔小心聽到後面兩個小朋友嘅對話。

你大個一定要睇啊!
睇咩啊?
我開嘅Channel啊,之前咪講過我大個要做Youtuber嘅。
咩Youtube8啊(下刪一堆無聊的笑聲……)
但你打算拍咩啊?
笑聲過後佢再講起
戰地xx,傳說對決啊。
確實嘅名稱我都唔太肯定
你打機咁屎,邊有人睇啊(下刪一堆無聊的笑聲……)

我無參與佢哋嘅對話,只係聽住後面兩位年少無知嘅小朋友的「夢想」對話。首先畀我戴個頭盔先,我完全無貶低「Youtuber」這個職業,甚至我都係幾個Youtuber嘅粉絲。而其實我都唔係第一次聽到小朋友話想成為一個Youtuber,喺田徑隊有聽過,喺自己班房有聽過,輔導小朋友嘅時候都聽過。問題就嚟啦:

點解Youtuber咁吸引小朋友?

「Youtuber」——即係YouTube名人,係指專門在YouTube平臺上傳影片的網絡名人及攝錄者。依個職業全都因近十多年嘅網路興起,各式各樣嘅YouTuber出場,由起頭既思覺老師,走到之後又有Eminleo或者Ming仔,近年比較多年青人接觸嘅熊仔頭或者「開台啦!開台啦!」所以出名嘅達哥。我唔知道YouTuber嘅工作係咪一份輕鬆的工作,但起碼係小朋友心目中,絕對係。學校嘅功課每日都令學生透唔到氣,家長或者教師都會向佢哋灌輸一套——

做功課咁辛苦都係為你第時好嘅思想

人稱「達哥」的林慧韡,由打機直播到開發自家遊戲。(資料圖片)

又或者見到爸爸媽媽做嘢咁辛苦,大個都唔想成為佢哋嘅一分子,有份不勞而獲的工作擺在眼前(起碼佢哋咁認為),仲唔個個都想投身喺這個新興行業咩?

成日話要寓工作於娛樂,小朋友有咩興趣?咪就係每天完成功課之後,果個幾鐘打機時間。Youtuber有唔少因打機而成名,當然達哥就係活生生的一個,有這麼大嘅模版放在眼前,小朋友實行有樣學樣,希望大個可以將佢哋嘅「興趣」成為「職業」,攞正牌大大聲講大個夢想。我就只希望佢哋大個左又真係去做依件事嘅時候,它仲係個「夢想」,而唔係個「白日夢」。

有時候,我真係唔知道要用個咩身份同佢哋解釋依件事。教育嘅本意只係為學生更加好,當然喺香港好多教育都只有Fail的份,甚麼創意思維班,創意,思維,又有何教授之處?又如何談其創意?但作為教師都只站喺進退兩難的位置,連老師其實都唔會知道Youtuber依個職業係唔係適合佢,佢又可能因為咁所以發咗達。網絡世界對新一代嘅影響都容唔上任何人去阻止,它亦的確慢慢改變著所謂的00後、10後。

再諗起果次輔導學生嘅時候,佢咩功課都無做,我問起佢大個想做個點嘅人,他提起自己想做一個Youtuber。我回:

「達哥,你識唔識啊?」

「識啊。」

「你知唔知人哋咩出身啊?」

「唔知啊。」

「人哋中大畢業架,你估做Youtuber唔洗讀書啊?你唔讀書無知識又邊有人聽你講嘢,你想講咩畀人聽啊。」

「……」

我唔知係唔係每個Youtuber都有高教育程度,幸好達哥的打機片是我大學時嘅解悶良藥,我都只係知道依刻佢不做功課,我就要罰佢……

(本文為投稿,稿件可電郵至iwanttovoice@hk01.com;文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。