ViuTV一歲仔 生日溫馨提示

撰文:
最後更新日期:
4月6日係ViuTV開台一周年。自從上年電視界冇咗最老嘅亞洲電視之後,接力有呢個BB出世,觀眾如我其實好開心,好似有位好朋友生咗個BB咁,雖然唔係我眠乾睡濕湊大佢,但係都好關心佢。趁住一歲,佢大變身,時段再排過,一改之前差唔多半年嘅死寂狀況。祝福嘅說話唔多講,在心中,呢度不如講吓對新台大變革嘅睇法同忠告,希望佢考慮一吓,愈做愈好。
Viu TV重點節目《跟住矛盾去旅行》開台打頭陣是政治人物梁國雄及曾鈺成同遊波蘭。(Viu TV圖片)
錯誤剷除2300
新時段,2300檔期變咗做《十五分鐘熱度》加《Girls'Talk》,呢個做法等於自毀長城。《矛盾》呢類強勢節目播完之後,新台嘅「黃金時段」就係靠《綠豆》、《晚吹》去打造嘅2300線,培養咗我身邊一班大台觀眾嘅新習慣:睇完2230-2300嘅綜藝節目就轉去新台睇睇。依家放棄咗呢半小時「黃金時段」真係好可惜,自斷米路。放綜藝好,放劇集也好,放外購劇都好,點會放《十五分鐘熱度》?
2130發球錯誤
開2130-2300時段,尤其係2130播自家製作劇集,擺明係要同大台死過。但宣傳不足,令到呢段時間對大部分觀眾嚟講好模糊。宣傳片當中所講嘅2130港產電視劇都仲有啲印象,但一直綑綁宣傳嘅2200至2300時段嘅「實況娛樂」原來係有兩段時間:2200-2230就係周一至周五橫行播放嘅《全職媽媽放大假》。2230-2300就係周一至周五晚晚唔同嘅綜藝節目。
(左起)梁諾妍、倪晨曦與紀君於《全職媽媽放大假》中組成美女保母團。(攝影:黃國立)
本來2130-2200時段電視劇若果做得好、搶到人,播完嘅時間大台嗰面已經播咗2130線劇嘅一半,絕對有誘因令到睇完新台劇集嘅人留低唔轉台,咁樣之後2200打橫線一至五播同一套綜藝節目就有意義,加強力度去箍住班觀眾繼續坐定定,而《全》根本係畀媽媽睇嘅,我呢個新台想搶師奶觀眾嘅推論就更加成立。
搶師奶客靠朱凌凌?
可惜如果你要同大台對撼爭客仔,2130線就要播啲師奶都啱睇嘅劇,搵《午夜伴廊》做頭炮就係非常不智。唔好講依家套劇嘅反應回響差,就算佢係得到一班後生仔支持,瘋狂嘅朱凌凌都絕對唔會吸引到一班師奶。點解唔係先拍先播《詭探》呢?當然到依家都仲未有片睇,唔知佢拍成點,但有邵仲衡、尹揚明,點都比《午》更吸引師奶,穩住咗個2130線,後面嘅收視就可能有連鎖起色。呢個橋頭堡唔能夠失守。
一星期播五集劇玩死自己
話說回頭,可能有人會諗ViuTV唔係想搶師奶客。如果佢播劇係想搶多啲後生客,咁放喺2130同埋一星期播五集係錯誤嘅決定。之前《綠豆》爆起,係要喺觀眾群當中慢慢累積回應回響,去到中段先真係多啲人講。前提係《綠豆》一星期只播兩集,啲年輕觀眾先有時間返屋企去追(加上佢係2300播咁先睇到),或者聽完朋友講覺得正,仲有時間返上網追嚟睇。依家星期一至五連續咁播,唔好彩連開兩日OT就冇時間追得返。講開OT,邊個年輕人依家可以晚晚2130趕返屋企追你套劇?根本成個排位係錯。套劇轉返做2300播就最好。我心目中最完美嘅排陣係好似日韓劇咁,星期一二播一套、星期三四播另一套、星期五休息一下,咁就可以解決年輕觀眾追唔切嘅問題。唔好話冇時間拍呀,其實新台都休養生息咗半年喇……
(《瑪嘉烈與大衛系列- 綠豆》電視劇劇照)
開0030陣線
新台嘅「實驗電視」好哋哋打開咗個深夜嘅時段,依家唔見咗。《衝三小》、《886MM》、《借宿一宵》,係咁易都講得出幾個節目,亦都成功以「實驗電視」之名設立咗一段「少少甩轆都可以接受因為佢係實驗」嘅時間。同時令到一班觀眾更加容易接受新嘗試。不過改咗節目排陣之後,就唔見咗呢個時段。點解唔喺0030播完新聞之後再開返半個鐘時段呢?依家就只有播無啦啦由0000調咗去0030嘅五分鐘貨仔《林說金曲》,之後就開始重播時段。對於後生觀眾嚟講,呢段時間先係佢哋開始坐定定睇電視嘅時間。唔用?嘥晒!咪留返去睇大台重播《妙手仁心》囉……
生活旅遊節目《衝三小》。(ViuTV提供)
祝生日進步
喺度衷心同新台講句生日快樂、生日進步,希望新台可以做得更好。唔係因為我憎大台,而係有競爭先有進步,對創作人嚟講咁先至有刺激,對高層嚟講對手有威脅先會肯去試新嘢。如果新台唔掂,大台就唔郁。你睇無綫踏入五十周年乜都冇搞,就知佢根本唔放新台在眼內。我咁緊張,因為冇好節目睇嘅話,最慘嘅一定係我哋呢班觀眾。

(本文純屬作者意見,不代表香港01立場。)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。