代表香港傳遞聖火 TVB撐阿叻具代表性
撰文：博評組
出版：更新：
阿叻成為今屆唯一一個代表香港的奧運火炬手。
仲有唔夠兩個月，巴西里約熱內盧奧運就正式開鑼，歷時 51 日嘅聖火傳遞，亦已進入尾聲。可能因為巴西寨卡疫情嚴峻，加上政局不穩，香港呢邊嘅奧運氣氛好似冇以往咁熾熱。但係唔講唔知，原來尋日有個香港人，去咗巴西做火炬手！係邊個？就係阿叻陳百祥。
唔係運動員，會考冇 12 條 A，又冇創辦 Facebook，點解里約奧組委會搵陳百祥做香港唯一代表？原來係無綫電視穿針引線，因為無綫擁有里約奧運嘅香港獨家轉播權，所以電視台可以派出一名代表，親自到巴西傳聖火。無綫人脈咁廣，千挑萬選之後，決定派出「親生仔」阿叻做港人代表。2008 年北京奧運嘅聖火傳遞，陳百祥都冇做火炬手，一係唔做，一做就去到巴西，阿叻話最多謝 TVB，仲話平時「一日操足 5 日足球」，象徵式跑 200 米，濕濕碎，仲識得徒手捉蚊，寨卡病毒都冇有怕！講真，真係由荷蘭叻到去巴西。
唔係運動員，會考冇 12 條 A，又冇創辦 Facebook，點解巴西奧組委會搵陳百祥做香港唯一代表？（香港電台截圖）
不過香港咁多傑出運動員，唔搵亞運雙金李慧詩，都可以搵世界第一嘅「牛丸」陳婉婷，一眾香港運動員都忍唔住問一句：點解係阿叻？無綫傳訊部副總監曾醒明話，陳百祥具代表性，大家唔應該質疑佢嘅資格咁話。連霍震霆都話唔關佢事，「商業決定」嘅嘢，你問返里約奧組委啦。阿叻自己就當然繼續認叻，叫你班網民唔使葡萄，話自己實至名歸：
TVB 因為我係資深嘅，我又做咗咁多屆奧運，咁多體育節目，世界盃呀，洲際盃呀，巴西都係我做嘅，所以我覺得搵我一啲問題都冇，我睇唔到個爭議係邊度喎
到底阿叻幾有代表性？諗唔明唔緊要，01博客夏水已經由電影、電視、體育……多角度分析陳百祥有幾叻。
延伸行動：
香港冇直播巴西奧運聖火傳遞，我哋見證唔到阿叻光輝一刻，唔知佢有冇好似林振強話齋，具備「獨力改變一個電視節目的質素」。但係唔使擔心，嚟緊奧運 TVB 獨家轉播，大把機會一睹叻哥風采，大家準備好喇～