【足球．博評】單一技術球員變恐龍？從轉會市場看足球發展趨勢

文：洛迪高@世界波

由於經濟因素同頂級聯賽電視收入及其他獎金導致唔少球隊購買力上升，令近年轉會市場熱鬧非常，除咗成交數及金額屢創新高外，更甚就係每日都有轉會新聞傳出。呢種情況雖然都因為媒體要呃hit rate而多寫嘩眾取寵式標題，但亦有時候係空穴來風未必無因。不過筆者從熱熱鬧鬧嘅轉會成交及傳聞中，覺得隱約能夠看出近年足球世界嘅發展趨勢。

兩隻字，就係要全能！因為巴塞隆拿數年前引起嘅tiki-taka之風，令唔少球隊意識到要隊波成功控球同傳送，就有好多機會可以掌握球賽主導權，消耗對方體力及可以組織進攻；另外由於球壇流行前場迫搶，如果攻方要成功保護控球權，就連後場球員都要有一定技術將波可以成功傳出迫搶圈，而唔可以盲目大腳送前。因此喺現今足球每個位置上，都要有一定傳停帶能力，呢個現象亦喺轉會市場有所呈現。

龍門：要識傳波最緊要?

由於哥迪奧拿（Pep Guardiola）嘅關係，而家唔少球隊都希望龍門可以用埋波，因此好似曼城就喺上季簽入巴禾（Claudio Bravo），今季就簽入巴西門將艾達臣（Ederson Moraes）。皇馬睇中曼聯門將迪基亞（David de Gea）多時，除咗因為佢喺西班牙一號之外，佢出色嘅腳下技術都係其中一個原因。至於市場上一啲比較受歡迎同追逐嘅門將，似乎佢哋受嘅關注，多數都係因為腳下技術，就好似曼城喺購入艾達臣前頗頗傳出想回購舊將，現時效力緊皇家蘇斯達嘅阿根廷門將魯利（Geronimo Rulli），而家都受拿坡里等球會追逐。至於傳皇馬嘅另外兩個目標高圖爾斯（Thibaut Courtois）同當拿隆馬（Gianluigi Donnarumma），喺處理球時都比較冷靜。不過龍門最重要嘅質素係咩?睇怕唔可以忽視撲救，如果唔係哥帥就唔會搵嚟艾達臣頂替巴禾。

中堅：組織至上

閘位/翼衛：進攻為主

講完中堅就到閘，隨住3後衛陣式復興，加上愈嚟愈多嘅內楔翼鋒，因此閘位球員嘅攻擊能力就更受買家球會看重，如傳出轉投曼城嘅丹尼爾艾維斯（Daniel Alves），雖然30有4都一樣有市，另外亦盛傳車路士要買祖記左閘球員阿歷士辛度（Alex Sandro），仲有連皇馬右閘丹尼路雷斯（Danilo Luiz）都有市場！另外皇馬都唔執輸買咗同城死敵馬德里體育會嘅進攻型左閘迪奧靴南迪斯（Theo Hernandez），搵定人繼承馬些路（Marcelo Vieira）嘅進攻火力。不得不提嘅仲有AC米蘭簽入嘅列卡度洛迪古斯（Ricardo Rodriguez）。

中場球員及前場攻擊球員：又要攻又要守九項全能

首先講下中場球員，加維臣（Thomas Gravesen）式中場悍將早已不受待見，取而待之係好似車路士去年搶得嘅簡迪（Ngolo Kante），而今年傳曼聯想買嘅馬迪（Nemanja Matic）、惹唔少球隊垂延嘅尼恩高蘭（Radja Nainggolan）、巴卡約高（Tiemoue Bakayoko）、AC米蘭早早簽入嘅基斯爾（Franck Kessie）及RB萊比錫嘅拿比基達（Naby Keita）等，一係全能型Box-to-Box中場，一係以守轉攻都有番咁上下嘅中場，就連摩納哥中場法賓奴泰華利斯（Fabinho Tavares）更係右閘出身，算係另類全能。

前場進攻球員就更惡撈。用一句改篇歌詞嚟形容一下，就係「又要攻又要守九項全能。」兩隻字講我掂：就係「全能」。好似盧卡東尼（Luca Toni）之類嘅單一作用型前鋒已經不受待見。今年夏天已成交嘅拿卡錫迪（Alexandre Lacazette）同盧卡古（Romelu Lukaku），加埋瘋傳離開拖連奴嘅比洛迪（Andrea Belotti）以及曼聯傳到似層層嘅莫拉達（Alvaro Morata）都屬於衝擊型/活動型前鋒、另外險離馬德里體育會嘅基沙文（Antonie Griezmann）就屬於可鋒可輔嘅球員，呢兩年都傳去皇馬/曼聯嘅利雲度夫斯基（Robert Lewandowski）亦係極全能嘅球員。上述講嗰幾位鋒線球員，活動範圍都唔限喺中路，亦可以承擔部份前場防守任務，因此亦更受青睞。至於被指態度有問題，又唔多肯防守嘅占士洛迪古斯（James Rodriguez），就其實有價無市，所謂投曼聯都只聞樓梯響……

簡單嚟講，就係喺足球世界無論咩位置都愈嚟愈要求全能，需要具備多樣能力應付攻守等技戰術要求。單一技術夠強或功能嘅球員可能就嚟變成恐龍……未來轉會市場，應該都會跟住呢個趨勢走吧……

（文章純屬作者意見，不代表香港01立場。）