【英超．博評】張伯倫棄車揀利，皆因想踢中場？

文：洛迪高@世界波

英格蘭張伯倫（Alex Oxlade-Chamberlain）喺轉會期最後階段，選擇放棄提供較高人工嘅車路士，而揀利物浦，原因張伯倫親口講過話想做第二個謝拉特（Steven Gerard），亦算吻合當初外界指佢棄車揀利嘅理由——唔想踢翼衛而想踢中場中。不過佢呢個決定，似乎將自己睇得太高，原因可以係因為內在嘅對自己能力認知不足，亦有外在嘅英國傳媒追捧。張伯倫今次決定成唔成功未可知，但已令我諗起佢一位英軍前輩——朗尼（Wayne Rooney）。

朗尼由出道開始，已獲吹捧接近為英格蘭近代不世出嘅天才，年輕時嘅佢有衝勁，有速度，有力量，技術唔差而且甚具靈氣加上體能甚佳，又不時靈光一現震驚世人，如一腳射破阿仙奴嘅成名入球及效力曼聯時遠程轟入紐卡素嘅凌空抽射。正因為佢喺球場嘅全能表現，一向愛早早將年輕球員追捧上天嘅英國傳媒又點會肯放過呢次機會？朗尼能力雖好，但個人及團隊表現最為成熟嘅時候，正正係佢擔當第二前鋒輔助C朗拿度（Cristiano Ronaldo）攻堅時期，當時無論係策劃到埋門都甚為全能，C朗離開後一年，朗尼喺曼聯出任正前鋒時刷新自己球季入球紀錄，雖然團體成就不甚突出，但足以令當地傳媒為朗尼高呼當時為C朗做二把手而大感不值，但正正係如此態度，配合個人原因，令佢開始變得四不像。

自從當年開始英媒都多番表示朗尼最佳位置為中鋒，但朗尼技術特點其實比較適合面對對方禁區嘅角色，到朗尼狀態不佳，或部份場次出任進攻中場有所表現時，媒體又會指佢喺攻擊中場可有一番作為，然後當前場有球員喺能力上迫到朗尼要打中場中時，媒體又會指朗尼轉邊好有大局觀（其實大部份時間都係轉邊畀右邊嘅華倫西亞（Antonio Valencia）)，未來能定位如此，到朗尼喺防中表現回落時，又會指朗尼都係踢前鋒最好，結果朗尼就係呢個循環入面不斷上演自我迷失。其實歷代曼聯或英軍教練已盡力為月巴騰出位置，雖然朗尼全盛期時真係好使好用，但如果佢真係於某個位置嘅能力鶴立雞群，又何需遭此待遇？可惜球員本人可能因媒體引導，先會成日覺得:「我踢邊度邊度先最好？」

媒體經常表示因為朗尼太全能，導致周身刀無張利，但媒體又有冇諗過，自己有份做成呢個現象？

放喺張伯倫身上同樣有咁嘅情況，筆者印象中唔太記得佢喺中場中位置有過連續嘅出色表現（當然可能因為無咩出場機會），有阿迷朋友更同筆者講佢真係唔多適合踢中場中，而筆者亦睇到身形及衝刺十足欖球員嘅佢，踢邊線表現都算唔錯，咁佢又點解突然會想踢中場中？喺瞓醒覺覺得自己踢中場中好好多？定因為牛頭角順嫂同賣魚勝傾計時話佢踢中場中好好？筆者甚至記得連英媒都無咩點吹捧佢踢中場中，咁張生如果唔係想為離開阿仙奴搵藉口，相信好多人都為咗佢今次決定大感不解加不表樂觀，同時會認為佢想踢中場中嘅決定係把自己看的那麼高……

另一個例子，筆者就想舉基爾獲加（Kyle Walker），雖然佢無話自己要轉位置，但同樣以初為熱刺登場時嘅衝勁令球迷眼前一亮嘅佢，因此心雄而令佢喺往後日子不時有魯莽之舉，而有好多基本野未做好，而現今熱刺及英軍頭號球星哈利卡尼（Harry Kane）都要小心，因為近年入球率相當不俗嘅佢，已有輿論希望佢做得更多，如果佢掌握唔到平衡，只會成為朗尼二世……

隨住外援大量湧入英超，英格蘭本土球員發展空間遭到壓縮，唔少球隊嘅中場及前場中軸球員，往往都係外援，唔少本土球員一係無得出場，一係要靠邊站委身邊線等成為綠葉性輔助球員，加上英格蘭傳統藍領足球風格，因此本土球員最為人稱道嘅唔係技術及對戰術理解能力，而係打甩門牙和血吞，唔夠人快都要追到尾嘅拼搏精神，而張伯倫打翼衛時嘅出色表現，恰恰證明張伯倫唔好諗太多，正如佢前隊友禾確特（Theo Walcott）踢右翼鋒時表現唔錯，但佢偏偏想踢前鋒，反而令自己出場機會減少。

除咗對自己實力認知不足，好似張伯倫咁其實係將自己利益放得大過球會，尤其是佢其實不乏出場機會而且近來表現唔錯。同張伯倫相反嘅就有同樣為英格蘭人嘅丹尼路斯（Danny Rose）及占士米拿（James Milner），本身左翼出身嘅佢，喺被熱刺借到新特蘭後喺左閘位置踢出一遍天；至於占士米拿更係萬能戰士，而佢同樣都獲英媒追捧過。雖然好似占士米拿咁做通天老倌隨時會變成第二個朗尼，好似路斯咁委身非出道位置都有可能因時勢而掩蓋本身潛能，但對於時勢及自身能力嘅判斷如果做得好，對於自己以及球會，都會係一件好事，如果佢哋眼中仲有球會的話。

最後，對於對自身能力及定位唔清楚嘅球員，有時尚可歸咎傳媒，經理人及損友；但認為自己醒過教練嘅球員，我奉獻一句：

Ask not what your club can do for you, ask what you can do for your club.

（本文純屬作者意見，不代表香港01立場。）