【西甲．博評】蝙蝠重生！華倫西亞再挑西超雙雄

文：洛迪高@世界波

往日蝙蝠軍團華倫西亞，連年做到西甲三哥，如果話皇家馬德里同巴塞隆拿係西超，咁華西就可以講自己係西甲冠軍，但後來因為財政及種種問題，華西就要讓位俾馬德里體育會甚至西維爾。（巧合嘅係，帶領西維爾穩定地上到西甲前列及連奪歐霸盃嘅領隊，恰恰就係當日帶領華西緊隨皇巴身後，現任巴黎聖日耳門領隊艾馬利（Unai Emery）。）

不過喺今季西甲，由於皇馬季初連場失分，令表現出色嘅華西可以開季至今以11戰8勝3和佳績佔據第二位，以4分落後榜首巴塞，而以4分領先第三位嘅皇家馬德里，令一眾蝙蝠球迷為之一振，原因為何，當然要從球員、領隊甚至管理層講起。

先由管理層講起，華西搵嚟馬略卡前主席艾利文尼（Mateu Alemany）擔任球會主席，佢深知要令球隊回到昔日位置，真係要全盤洗牌，頭一個措施就係減少金牌經理人文迪斯（Jorge Mendes）喺球隊嘅影響力。由於早前球隊經常被指被文迪斯用嚟搵錢而安置一班名氣大但實質作用唔明顯嘅球員入隊拖低成績，因此今夏球會率先送走由球迷指責嘅文迪斯頭馬安素佩雷斯（Enzo Perez），再由新委任嘅前黃潛艇維拉利爾領隊馬些連奴（Marcelino）有相應權力送走冗員，同換入新血，為今季暫時嘅成功舖好根基。

講完高層，下層就到領隊馬些連奴，馬些連奴今季擁有西甲最年輕嘅陣容，當然係大打活力波。主力陣式為442嘅華倫西亞，並不以傳控為戰術（馬些連路講過，如果一隊波有80%控球率但得3個中框埋門，我會覺得好悶），而係多作縱向傳送以速度快速進襲對手防線！呢度講嘅縱向當然唔係指英式長傳。華西今季有唔少入波都係防守反擊，先好好防守，然後再利用速度活力，瞬間打反擊並製造人多打人少嘅優勢，之後就利用球員個人能力埋門或配合入波。

講完戰術，就要講佢為球隊重新注入紀律及戰鬥精神。比起之前軍心渙散嘅華西，今季球隊將士明顯好團結為球隊貢獻，其中喺維拉利爾時就喺馬些連奴麾下效力過嘅前阿仙奴中堅包列斯達（Gabriel Paulista）就讚到恩師天上有地下無，而隊長柏利祖（Daniel Parejo）就話佢係全世界第二好教練，第一係邊個？就係現時巴塞領隊華維迪（Ernesto Valverde）。咁馬些連奴做過咩激起球員鬥心？筆者舉一個例子，就係球隊中脂肪比例超過9.5%嘅球員，就無機會出場。試問咁樣，有心踢嘅球員就當然要搏命操搏命踢搏教練歡心，至於唔啱心水嘅球員，好似尼格度（Alvaro Negredo），拿尼（Nani）及迪亞高艾維斯（Diego Alves，就算名氣點大都無得留低。

領隊知人善用，都要球員夠爭氣！華西今季引入唔少新球員，都可以發揮好大作用，而佢哋當中唔少唔只要為球隊，亦要證明自己實力，所以都踢得特別落力！先要講嘅就係意大利前鋒沙薩（Simeone Zaza）。因窒步12碼而俾人恥笑到而家嘅佢其實實力不俗，當經歷過一次完全失敗嘅英超之旅後，於16/17年1月外借華西，並於今夏完全轉會，今季佢作為雙箭頭其中一人，無論入球定係利用傳球或走位為隊友創造機會都有好大貢獻，實行用行動希望球迷們記得佢嘅好表現。

華西今夏亦有借入2位希望向原球會證明自己實力嘅球員，佢哋分別係由巴黎聖日耳門借入嘅古亞迪斯（Goncalo Guedes），以及由曼聯借入嘅安德斯彭利拿（Andreas Pereira）。古亞迪斯加盟巴黎之初，雖令唔少人感驚喜，但都曾對佢寄過厚望，但可惜佢上陣機會唔多，結果今季外借加盟華倫西亞成為球隊戰術核心人物，佢嘅個人突破能力的而且確令球隊嘅防守反擊增添極大威脅性。至於彭利拿就同樣想有更多上陣機會，而不顧紅魔領隊摩連奴（Jose Mourinho）反對，主動選擇借到蝙蝠軍團。雖然未算穩定正選，但上陣無論喺中路同邊線都唔少表演機會。另一位新將包列斯達就更加唔使講，為咗報效恩師自然搏命。

至於華倫西亞曾經引以為傲嘅青訓終於繼左閘加耶後再出一位表現驚艷嘅球員，佢就係中場球員蘇拿（Carlos Soler）！今季堀起嘅佢現時已惹唔少豪門球隊垂延，但佢已表明忠心並續約，據聞違約金仲達8千萬歐元！

華倫西亞經過早前加利尼維利（Gary Neville）及普蘭迪利（Cesare Prandelli）等頻繁嘅教練更迭後，現今似乎搵到真命天子，而曾經俾球迷鬧爆嘅班主林福榮暫時有得抖下，但未來如何？借將如果要回歸原球會，球會又應該如何是好，而陣中球員如果俾人挖角又點算？除咗要睇馬些連奴功力外，似乎華倫西亞球迷們更希望有更多青訓產品同球會共同進退。

（本文純屬作者意見，不代表香港01立場。）