那些年翻生的球星
生命滿希望，前路由我創！昔日意大利神童巴洛迪利（Mario Balotelli）沉淪幾年，本來去到法甲大家都唔睇好，不過佢去到尼斯就相當爭氣，唔止無再神神怪怪，牌又拎少咗（早前對羅連安特試過雙黃一紅被逐，不過後尾球證承認犯錯打得甩。）仲入返波！
最近4場入咗5球，比起上年由利物浦外借AC米蘭時20場入得1球已經有好大進步！
咁多年嚟，其實唔少球星受過一時挫折，不過唔少都可以重新出發再次發光發亮，等世界波嘅洛迪高同大家介紹返！
賓艾化 （Ben Arfa）
賓艾化翻生，同巴神有一個共同點，就係效力尼斯，分別在於尼斯現任領隊係前慕遜加柏教練法夫爾（Lucien Favre），而賓艾化當時教練係現任修咸頓教練佩爾（Claude Puel）。賓艾化本來喺英超紐卡素都發展順利，不過因傷病等因素，去到後期仲要外借侯城，最後要返祖家踢尼斯。喺尼斯呢一季，佢踢咗34場入咗17球，仲有金球表演添！仲憑呢季嘅演出獲得加盟法甲盟主巴黎聖日耳門嘅機會，但係上陣機會唔多，睇怕又要準備再翻生……
簡拿華路（Fabio Cannavaro）
現任中甲天津權健教頭，當年喺柏爾馬同杜林及保方等同伴幫助，球隊成為「意甲七姊妹」其中一隊，不過後來因為財政問題，被賣去國際米蘭，不過佢喺國米嘅歲月簡直不堪回首，最後國米將佢賤賣到祖雲達斯（國米得到祖記後備門將卡連尼（Fabian Carini）…）結局大家都知，就係簡拿華路憑06世界盃嘅演出，轉投皇馬仲拎埋金球獎……
法圖斯 （Festus Baise）
翻生嘅除咗有國際球星，仲有本地球星。啱啱幫中甲球隊貴州恆豐智誠升上中超嘅佢，效力南華時遭到棄用，最後轉投本地球會公民（一腳蠍子腳烏龍仲「名」滿天下）。隨住最近兩戰中國表現出色，獲得中甲球會垂青，仲喺球會衝超路攻入6個入球！
史奈達（Wesley Sneijder）
由阿積士轉投皇家馬德里嘅佢，雖然開始時有突出表現，不過隨住受傷慢慢失去位置，最後轉投摩連奴麾下嘅國際米蘭，仲馬上幫國米喺打吡入面大勝AC米蘭，季尾仲幫球會奪得三冠王（意甲、歐聯及意大利盃），仲隨國家隊奪得世界盃亞軍，可惜最後都係失落國際足協金球獎……
安基（Robert Enke）
唔係每個翻生故事都係以大團圓結局告終，至少前德國國家隊門將安基唔係……安基職業生涯初期喺賓菲加表現不俗，得到加盟巴塞隆拿嘅機會，可惜佢喺巴塞嘅時光過得並唔愉快，並且要租借畀西班牙嘅特內里費及土耳其費倫巴治，可惜都未能扭轉佢喺巴塞嘅歲月。佢04年離開魯營，更因呢段經歷患上抑鬱症，以自由身加盟漢諾威。安基喺一直隱瞞病情下，於呢間球會表現大有起色，仲藉此入選國家隊。可惜到最後，佢因為女兒喺2歲時因心臟病逝世而一直未能走出陰影，加上領養一個囡囡後，怕被揭發有抑鬱症後會無埋呢個女，最後於09年卧軌自殺身亡。
雖然安基故事係一個Bad Ending，但總括嚟講，球星能夠翻生，靠嘅除咗係夠運遇上伯樂，仲要本身真係有實力，同埋心理質素夠強先可以反彈！佢哋做到，我哋普通人都得！聽日一定會好天嘅！
（本文純屬作者意見，不代表香港01立場。）