【狐狸葡萄估你唔島】2016最爆球壇大事

2016年即將完結，喺迎接2017前，老老土土都要嚟個一年總結！世界波決定為大家揀上幾個「2016球壇最爆」……

文：洛迪高@世界波

 1. 神奇的狐狸 

英超有一隻狐狸，不狡猾但神奇，佢係李斯特城，上屆英超冠軍盟主。喺英超越發商業化嘅情況下，英超有力挑戰者近年嚟嚟去去都係嗰幾句。不過喺2015/16球季，包括車路士同曼聯等勁旅集體掉隊，結果造就「補鞋匠」雲尼亞里吐一口氣，奪得自己領隊生涯第一個頂級聯賽冠軍，亦令華迪、馬列斯及簡迪一眾奪冠功臣人氣同身價都急升！

 2. 葡萄成熟時 

對上一次葡萄牙打入洲際大賽決賽，留低嘅只係希臘的童話，以及C朗的眼淚；今年喺法國舉辦嘅歐洲國家盃，葡萄牙因為喺過程中毫無霸氣（分組賽僅憑最佳第三名名額出線），其實連黑馬都稱唔上，但偏偏喺強實嘅防守下，成功殺入決賽，最後對上東道主法國，縱使主力兼隊長C朗早早因傷退場後，反而於加時入波擊敗法國，令C朗再次留淚，而今次就係開心嘅淚水，而佢亦留低喺場邊「指揮」嘅身影。

 3. 估你唔「島」

另外一次喺今屆歐國盃創造新奇嘅球隊仲有冰島！呢支第一次打入洲際大賽正賽嘅冰島，喺分組賽同最後盟主葡萄牙同組，最後以1勝2和次名晉身16強，16強更擊敗英格蘭！雖然最終喺八強不敗主辦國法國，但佢哋嘅戰鬥精神及同球迷打氣互動嘅場面就令人難忘！

 4. RB萊比錫 

新一季聯賽德甲都有驚喜，就係唔係人見人愛嘅升班馬RB萊比錫！RB萊比錫因為畀一眾德國球迷當係老細足球而紛紛反對甚至鄙視。不過有紅牛資金撐腰嘅球隊，喺無瘋狂大手購入球星下，曾經做過榜首，而家歇冬只喺落後班霸拜仁慕尼黑3分！

 5. 2016最爆交易 

對於轉會市場，今年都算瘋狂一年！之前皇馬買C朗同巴爾夠癲未？淨係英超喺轉會支出方面，已經連續6年上升（今年用成11.6億英鎊）。其中祖雲達斯購入前鋒希古恩，以及曼聯購入今夏轉會標王嘅普巴都分別用咗9千萬歐元及接近1億歐元，相信轉會市場未來只會更瘋狂更高價……

 6. 2016球壇最悲哀慘劇 

喺呢一年球壇亦發生咗一單慘劇，就係巴甲球會查比高恩斯空難慘劇……經調查後，有關方面已證實飛機係因為燃油不足加上人為錯誤而墜毀。結果導致71死亡，查比高恩斯球隊遭遇巨大打擊，希望已準備重新振作嘅球會能夠盡快恢復元氣。

2016年足球界發生太多，未能盡錄各項大家心目中最爆嘅事，惟有趁年尾展望2017，期望有更多好事，更精彩嘅比賽而少一點悲劇慘劇，祝大家新年快樂！

（文章純屬作者意見，不代表香港01立場。）