【德國生活誌】《Running Man》算小兒科 德國電視仲痴線
病咗幾日，小菲做個最乖的病人——安守家中睇電視。但網絡忽然 down 機，害得小菲睇新戲睇到一半就拜拜，一秒就將小菲送返去冇網上的八、九十年代。時光倒流之下，最大娛樂當然就係電視。
For God sake，唔好扮喇，其實小菲根本自從住在德國後，已經開始與電視為伴，淪為一個單手打字一邊食飯一邊用電腦一邊睇電視的廢青。
冇字幕架！呢個世界冇字幕架！
但係，想做一個睇電視嘅廢青都唔容易。德國電視台擺明服務德國人，德國人講德文是常識吧？即使是買回來播的外語節目，甚至乎逢星期五的「日本動漫一條龍」，電視台都好貼心咁配晒音做德文。以為電視台會有 NICAM 雙語廣播？播外國戲都至少有英文原音卦？冇喎，唔好意思！呢度各大免費電視台都唔會有「非德語」的聲音。
咁小菲諗住唔識聽，睇德語字幕都叫學下德文吖。就連無線咁事事旦旦，都會畀句「我地一齊高呼一次」的 goodest chinglish 大家睇睇。但德國？唔好痴心妄想啦，字幕？咩黎架？食得架？佢地咁喪心病狂，緊係連德文字幕都冇啦！
學識喺惡劣的情況下生存，係小菲一事無成入面的最大成就。小菲真係意志力好高先可以捱得住，住落就慣啦唔使驚。當年，小菲阿嫲就算唔識英文，都睇晒成套《鐵達尼號》，仲要喊到豬頭咁收唔到聲，冇字幕又點會係障礙喎！唔好為懶惰搵藉口喇。
德國電視把尺好大 露械露點沖涼小兒科
小菲一早就同德國真人騷情訂終身，德國真人騷真係一睇上癮。事源當年人在柏林，除了日日啪幾條 currywurst，唯一最記得就係喺酒店睇《Big Brother》（台譯：名人老大哥）。當年的《Big Brother》人氣一時無兩，地鐵站大大張海報話你知「Big Brother is watching you.」，有小小好奇心的都會睇真張海報賣緊乜，睇完就緊係自然上埋賊船落唔返嚟。德國電視把尺好大，露械露點沖涼「 no big 雕」啦。
今回嚟到德國，小菲唔覺意又上多次船，大大話話睇咗十個八個 reality show／game show。 如果俾媽咪知道，可能真係鬧到小菲上天花板：「你越洋竟然忙住睇電視，are you joking me？不如返香港做返廢青算數把啦你，至少逢星期一仲可以陪我飲茶。」
真嘢唔好拎出嚟講……做廢青真係情願做到去德國。
做廢青都情願去德國做？
小菲留意到，德國 game show 其中一個賣點，係贏錢。同英國唔同，喺英國最多係唔小心碌入去賭錢的電視節目，成日賣廣告，送錢，叫你免費試玩。英國嗰種係賭錢，德國呢種係獎金。如果小菲做廢青，真係留返喺德國做，每三個月揀個 game show 玩下，都可以夠錢維持生計。
香港有嘅係《歡樂今宵》，《殘酷一叮》同《百萬富翁》，但俱往矣。喂，小菲話你知德國的《百萬富翁》已經做到 season 13 喇，長做長有。讀多啲書贏返少少錢，都夠小菲日日食血腸。之前提到的《Big Brother》亦未收科，早個月先做完一季，仍然有 noise。剛剛有選出最新一季好手的《Ninja Warrior》，贏出當然重重有賞啦。而最爆炸的莫過於係唔覺意發現嘅《Schlag den Henssler》，今次唔係外買版權，真係德國自家制，小菲只能夠用「好痴線」嚟形容（no offense）！
睇電視都睇到黑人問號
小菲發現《Schlag den Henssler》的時候，節目已經去到尾聲，但仍然無減內心的興奮。嗰晚已經去到半夜，心諗點解呢個好似玩緊《Running Man》的 game show 右上角竟然有個「live」字，而且過晒十二點喇喎，重 live？嘩，咁古蠱，一定係好嘢！
喂，真係 live 架！兩位着住一紅一藍制服參賽者，會同主持舉手申請去廁所，咁佢去咗廁所的時候大家就真係等佢返黎；真係有埋現場觀眾大家一齊等。遊戲又怪到冇人有，又鬥智又鬥力。例如（1）要你用酒杯在有條件的情況下鬥快將裏面的有色波子換去對面，又或者要你用條繩順 number 勾住啲釘；（2）鬥快睇相作答，包括認出德國足球國家隊同埋國家元首人物，又或者係汽車零件名稱同埋世界地圖（問題範圍之廣真係嚇死你）。唔識聽德文，小菲真係睇到黑人問號，但係錯漏百出先最好笑，主持問問題但唔覺意手快快騷埋答案，波子左右又擺錯。不枉小菲開埋薯片食住雪糕睇落去。
首集開播，呢兩條友已經搞到獎門人咁同分打和，好鬼緊張。小菲亦都冒住咁睇落去唔知會唔會要睇天光的精神睇埋落去；但鬥到難分難解竟然同分打和的兩人，最後第十五回合的比試竟然係……
我到底睇咗啲乜！！！！！
由於唔識聽德文，小菲每個 game 都只好估估下。只係冇諗到最後決戰紫禁之巔，呢兩個麻甩佬竟然分別攬住碌柱！Well，佢地攬住碌柱……鬥…耐…呀！持久力呢味嘢，真係每個男人的最大關口，冇人想俾人知道自己唔夠持久，所以小菲睇住佢地本老命盡地一舖。當然，除咗面子尤關，最重要嘅係獎金有 250,000 歐元！即係話你大戰十五回合，攬住碌柱贏埋，閒閒地就二百萬港幣落袋。你唔係最後先嚟放手呀嘛？
翻查資料，《Schlag den Henssler》一集放映 305 分鐘，即係連播五個鐘！一年預計會做 5、6 次，小菲可以喺第一集發現到佢嘅存在，真係三生有幸到想喊。
（文章純屬作者意見，不代表香港01立場。）