【關公災難】也許關公很忙
撰文：夏水
出版：更新：
大大小小被網民戲謔之「關公災難」可謂無日無之，一句話一幅相一個代言人，通通變成青龍偃月刀，斬得各品牌公司屍橫遍野一地血污。
Nikon早前舉辦攝影比賽，被網民發現得獎作品為合成圖片，成為「關公災難」。(Nikon Facebook截圖)
據聞黑白二道都供奉關公，有時諗，真正開片時，關公到底會保佑邊個？正氣緊要，定雷氣珍貴？關公很忙，可能因為收足兩家茶禮，to幫or not to幫，真係一個比刮骨療傷痛十倍之問題。
至於公關業界，要拜神求保佑，可能要拜拜Raymond。Raymond者，三國呂蒙也，出名在：
1. 有句成語關佢事（吳下阿蒙個典故自己查）
2. 斬咗關公個頭。
大小公關只求呂大爺幫手，過一兩招散手好似「白衣渡江」咁，殺退關公免災難。
進擊的關公斬到一地血
「關公災難」，2015香港熱話，亦強勢殺至2016。
回首過去，大大小小被網民戲謔之「關公災難」可謂無日無之，一句話一幅相一個代言人，通通變成青龍偃月刀，斬得各品牌公司屍橫遍野一地血污。網絡3.0時代來得快又狠，每個人都是24小時不停喪loop之媒介，都是一個獨立品牌，輿論威力委實不容小覷。
Mastercard早前找梁列唯拍廣告，有網民發起剪咭行動。(出自Mastercard Facebook的網民留言)
而家公關要照顧關公 又難又忙
以前，公關搶630頭條、報紙A1就是，大老爺最緊要Mark實老總編輯，有事打個電話去溝通溝通；今日，功夫依然要做，不過請記得，大台已被唾棄，係新聞出現唔一定係好事；報紙要出，不過最好先出即時動新聞；要改變老總個立場，不如先諗下點先唔會得罪社交媒體上一班意見領袖。
老一輩公關要改變難，好些仍努力被迫扮 in 勤上面書睇《毛記》，雖然00後早早轉玩IG；更難為是部份老闆堅信我大晒，網民有咩好怕，出事後，好傻好天真刪post，宣稱被hack，以為無事，後來才發現，無事，係無人踩場之餘亦都無晒人氣收視，眼白白睇住關公過五關斬六將，然後又要求公關幫佢善後，「我唔要見到呢啲負面嘢！」
地球很危險，網絡更高危。行得太快，會跟車太貼車毀人亡；行得太慢，又不知人間何世何謂「食好西」。關老大，你隻赤免好快，能否暫停你的無雙mode？
（本文純屬作者意見，不代表香港01立場。）