【廢青求職攻略】如何在見工過程，洞悉份工伏唔伏

臨近年尾，我知你諗緊跳唔跳槽好。
跳：魚唔過塘唔肥，跳槽令人工假期職位加得好啲；做得耐轉吓環境都係好事。
唔跳：離唔開comfort zone，啲嘢上咗手，做得好順暢，出到去又由頭適應過。

選擇唔跳槽者可以唔使睇落去，呢篇嘢係寫畀磨拳擦掌、連辭職信範文都準備好嘅人睇嘅。打咗幾年工，你應該都知道香港職場地獄處處，唔睇清楚間公司就跳入去，好易由一個伏跳入另一個伏。如果計埋大學時期做part time，我見工次數無100次都應該有80次。因為大學嗰陣性格內向怕羞，我當見工係練大膽嘅機會！而喺香港working holiday嗰年，我最短份工只係做咗10日，轉工密加上我鍾意有幾個offer喺手慢慢揀，所以醒嘅蠢嘅HR我都見過了。分享吓點樣喺短短interview過程中分辨出間公司當你係人類定奴隸。

【相關文章：有無諗過，裸辭之後喺香港working holiday？】

1. 把握同HR小薯獨處時間，收收風

你去到間公司，第一個見你嘅一定係HR小薯，見工經驗少嘅人通常由呢刻就開始緊張……咪傻！佢完全影響唔到你interview結果，佢只係被派來叫你填表、影印、對吓學歷證明文件，但你絕對要對佢笑容可掬、唔該前唔該後咁，為嘅係打開話題匣子，簡單到「你哋呢度冷氣都幾凍喎」開始……

大膽啲盡量問多啲資訊：

「你哋差唔多放lunch，我快啲填好份form先，應該五分鐘ok㗎喇，我填完打你內線？驚阻到你。」

就係咁，我試過收到HR回覆係：

「哦唔急，我哋慣㗎喇，通常都遲。」

咁你都要有心理準備，個lunch time「通常都遲」！

咁當然啦，你唔好諗住喺呢十幾分鐘得到咩驚天動地大秘聞，但人心肉做，佢不斷影印都好悶，你寒暄幾句，知多啲無蝕。

「呢個post好似都出咗一段日子喎，你地要file咁多CV都幾忙…」（隨口亂講）

「ok啦，都幾多人見，今日你係第五個。」

咁你就要諗定，一陣interviewer嚟到，佢已經見咗四個人，點樣可以令佢對你有深啲印象。

秘訣係態度、聲線、笑容好重要，同埋唔好一本通書睇到老，要執生，如果佢好cool，你就唔好chur落去（但我好彩暫時未遇過cool嘅）。同埋上述招數只適用於HR小薯身上，HR阿姐戒心重好多，同埋有可能會嫌你煩。

2. 對住HR阿姐要單刀直入

如果我見工次數係80次，HR阿姐in過嘅人可能係800個，所以我係唔會冒險扮關心。佢對你嘅interview結果都有少少影響力，但除非你好串，否則好少會特登去影響個結果（唔通佢會多事阻自己收工咩）。佢通常都係了解吓你背景、過往薪酬福利、點解轉工、性格適唔適合公司文化同職位要求……既然佢問我咁多「以前幾錢人工」、「12定13個月糧」、「上年Bonus出幾多」……我當然都食住個勢問返佢，特別係「上年Bonus出幾多」！

咁樣你大概知道間公司有無人性，會唔會同員工分享成果。有時收到答案會係：「呢個stage我哋唔方便答住」或者「年年唔同」，呢Ｄ咁敷衍嘅答案我好少放過佢，「大約呢？因為呢個都係我考慮份工嘅重要因素」。咁通常佢都怕咗你畀個range你，當然個range有可能係假，所以，我喺再下一步見team head時，會再問同一個問題，然後比較吓HR阿姐同team head個答案相差幾多，就算我最後唔係做呢間公司，都起碼知道個市場價格走勢，個見工過程總算拎到啲資訊走。

3. 參觀吓pantry同廁所

喺等interview或者完咗之後，如果有人問需唔需要去洗手間，我一定會答好。因為一間公司個pantry同廁所嘅裝修、設備，你可以睇到公司對員工有幾尊重，如果pantry有零食、生果、各式飲品當然好，但如果個設計係好open，任何人行過都見到你斟咖啡，咁你預咗入職後都好少「私人時間」。

假設一份工最少做一年，廁所真係好重要！入到去好污槽／成地水，你要考慮吓自己忍唔忍受到日日出出入入。而且，連畀多少少錢搵間好嘅清潔公司都唔肯，公司對員工有幾重視你都估得到。

4. 唔好做低頭族，周圍望吓員工嘅樣

如果meeting room係喺office最入面，即係你要路過一堆「未來同事」，被人眼望望，呢個時候千祈唔好怕羞，你要眼望望返佢哋（係望，唔係睥呀吓），你可以見到有無人企喺其他人個位吹緊水？定每個人都好靜咁扮緊工？有無人上網？有無人面無血色？充滿怨氣？男女比例？枱頭多唔多私人物品例如公仔呀相片呀？甚至係mouse、keyboard同影印機新唔新？座位設計係點？

就係呢幾分鐘！！！夠細心你可以知好多嘢！祝你好運。

下篇我會分享吓唔想裸辭嘅人，點樣一邊返工，一邊偷雞見工而不引人懷疑。如果你有見工秘技／疑問，歡迎去我facebook留言分享。

（文章純屬作者意見，不代表香港01立場。）