矛盾對決：ViuTV online PR的ON & OFF

依家 ViuTV 又發咗個聲明，就《矛盾2》事件向王丹、馮敬恩道歉。身為電視迷嘅我關注嘅，就係睇吓佢會唔會放棄網上高度互動嘅宣傳策略。不過佢唔似 TVB，有一班固定而又唔係好用電腦嘅觀眾。網上高度互動策略，其實係吸引年輕觀眾嘅重要方法，如果唔玩，可以話係自斷一臂。

ViuTV抽起《跟住矛盾去旅行2》當中八九民運領袖王丹，以及香港大學學生會前會長馮敬恩嘅片段，唔播，原因係佢哋想透過節目去宣揚港獨，傳聞就連本土民主前線梁天琦同鄉事派侯志強嗰啲都要抽起埋，搞到大大鑊。

大家可以話新台無腰骨，又要威又要帶頭盔，但呢個純粹係電視台嘅決定，無對與錯。之不過依家新台講大話，屈王丹同馮敬恩自己開記者會講港獨，就係絕對嘅錯誤。有關呢件事所涉及嘅「港獨」、「實況娛樂抽水抽着火水」嘅題目，另外幾位 01Bloggers 張秀賢、梁翊婷、李立峯都有講過，我呢個電視迷就不如講吓 ViuTV 所用嘅網絡溝通平台啦。

今次《矛盾2》，ViuTV 透過新聞稿去公布「王丹、馮敬恩自己開記者會講港獨」，之後王丹話 ViuTV 老屈，隨後新台再出新聞稿還兩人公道。成事件，王丹用 Facebook，聚集咗唔少支持嘅力量，但新台兩次都只係用「新聞稿」呢個渠道。睇返佢 Facebook，成件事好似無出現過咁，之不過網民就喺每個 post 度留言追擊，ViuTV 就選擇唔回應。

當然啦，回應讚你嘅留言，一定係快過同容易過回應鬧你嘅留言，就算你唔反駁去認錯，你都要睇吓點樣 say sorry。呢樣嘢其實 ViuTV 有前科，今次《矛盾2》事件之前，仲有《瑪嘉烈與大衛：特別篇》同埋《Formula E 直播》兩件事，從中可以見到ViuTV喺處理失誤事件時嘅網上態度。

《矛盾2》《瑪SP》《FE 直播》　處理出事手法大不同

當日電視劇《瑪嘉烈與大衛系列：綠豆》口碑收視都勁，新台就乘勢再出四集各 60 分鐘嘅 SP 添食。我就淨係睇咗第一集，60 分鐘有成 55 分鐘都係舊片，得唔夠 5 分鐘係新嘢，餸頭餸尾炒埋一碟加棵蔥，就當係新餸再上菜。當晚群情洶湧，火滾嘅觀眾包括我在內，瘋狂喺 Facebook《瑪SP》預告片個 post 度留言，叫新台交代咁算唔算欺騙觀眾。結果留言無數，但回覆半個都無。

另一件事就發生咗無幾耐。ViuTV 拎到電動方程式賽車 Formula E 嘅直播權，第一日播到 6 點，賽到最後兩個圈嘅時候，居然乜都無講就 sharp cut 轉咗去播《六點鐘新聞》，大家又立即去 Facebook 留言以示不滿。呢次 ViuTV 就喺 Facebook 出咗個聲明道歉，又差唔多逐個留言去 say sorry 同解釋，賽車迷把火就算無冚熄，都叫做道咗歉，仲即晚安排返重播去補鑊。

三件事，喺 Facebook 有兩種唔同嘅處理。《矛盾2》同埋《瑪SP》就冷處理，用時間沖淡一切。Formula E 事件就鄭重出聲明公告道歉。點解？我無內幕消息，但係直播轉播賽事，應該係有同主辦單位簽約，最低限度都有協議。依家播唔晒係錯，所以焗住要鄭重道歉。而《瑪SP》係內部嘅事，所以喺 Facebook 無處理過，大家瘋狂留言都一樣唔駛理，過一排大家自然唔記得。

ViuTV 同大台不同　放棄網上互動如自斷一臂

今次《矛盾2》事件涉及港獨、王丹、馮敬恩，除咗係電視台自己製作上嘅內部問題，仲係政治問題。ViuTV 急急發聲明講大話諉過於人，又再急急發聲明還王、馮二人清白，兩次都無喺 Facebook 出過聲。照《瑪SP》事件嚟睇，就算觀眾喺 Facebook 留一萬次言，佢都唔會回覆。今次觀眾無發聲嘅權利。

其實開始咗網絡嘅回應慣例，就預咗出事嘅時候都要咁做。如果唔係就好似依家咁勁樣衰。錯咪認囉，何況都唔到你唔理啦。雖然有人話唔關個台嘅員工事，係老闆施壓，佢哋唯有「 Always agree with your boss 」。不過新台一直以來吸引觀眾嘅「開明、敢言」嘅形象，就受到無可挽救嘅撞擊。

反觀 TVB，佢都有 Facebook，但係一直都無乜做過同網民互動嘅嘢，係有開吓記者會、藝員互動直播咁，不過直播就可以避重就輕答網民提問，或者直接飛過唔答就算。而大台一直都無好似新台咁逐個留言回覆，無開呢個缺口，做得好、做得差都唔駛回應你哋。咁係保險嘅做法，但咁做嘅話，就寧願佢唔好玩 Facebook 啦，無眼屎乾淨盲。

依家 ViuTV 又發咗個聲明，就《矛盾2》事件向王丹、馮敬恩道歉。身為電視迷嘅我關注嘅，就係睇吓佢會唔會放棄網上高度互動嘅宣傳策略。不過佢唔似 TVB，有一班固定而又唔係好用電腦嘅觀眾。網上高度互動策略，其實係吸引年輕觀眾嘅重要方法，如果唔玩，可以話係自斷一臂。

到底新台最後會唔會好似上次《瑪SP》事件咁乜都唔理，等時間過呢？

（本文純屬作者意見，不代表香港01立場。）