【私心預測】2017上位電視男藝員

撰文:方以文
出版:更新:

2016年有ViuTV出世,雞年就即將有奇妙電視加入免費電視市場,個人希望香港電視界大戰可以一觸即發,我哋呢班觀眾就有好嘢睇。不過要有新氣象,除咗幕後創作團隊之外,幕前演員有新臉孔都非常重要。
女藝員嚟講,預計2017年同以往一樣,大台都力捧港姐華姐咁,反而男演員就無乜推測軌跡。我方以文就同大家估吓2017年有邊個男藝員有位上。風水佬呃你十年八年,我哋到年尾再嚟個賽後檢討,睇吓我嘅私心選有冇實現到。

何廣沛

由2014年《M Club女人俱樂部》被吳啟華指定演自己後生版嘅麥當當王子,何廣沛(Matthew)就以高姿態畀觀眾認識,成為大台上位男藝員之一。2012年由26期藝員訓練班畢業加入無綫嘅佢,係咁多同期同學仔當中最多嘢拍嘅一個,仲簽埋無綫經理人合約。喺2015年《樓奴》做麥包、簡慕華個囝多多、2016年《律政強人》做方中信徒弟Nick、到近期《財神駕到》做財神托世嘅王招財,嚟緊仲喺解封新劇《親親我好媽》做陳敏之嘅細佬,睇落順風順水。

呢位被吳啟華話「要揀個演自己後生嘅梗係要揀個最靚仔」嘅靚仔,喺唔少人眼中係扶搖直上,但其實佢都經過一段做無對白配角嘅日子(當然呢個日子比起其他人短好多)。包括《殭》裏面一出現就畀人隊瓜咗、得幾個鏡頭嘅無名殭屍,仲有《巾幗梟雄3諜血長天》裏面做行行企企嘅士兵。2012年加入藝訓班嗰時,Matthew話想5年之內有人認得佢,呢個目標已經達到咗喇。當年佢仲有個十年大計,希望十年後可以擔正做男主角,睇個走勢,似乎可以喎!

何廣沛,吳啟華都話佢靚仔。2016年仲拎埋「星和無綫電視大獎」最佳新人獎。
何廣沛喺《樓奴》做麥包、簡慕華個囝,同香香都有對手戲。
即將播出嘅《親親我好媽》做中學生,幾年前拍落,何廣沛童顏夠用有突。
賀歲劇《財神駕到》之後,再有《親親我好媽》,大台捧何廣沛之心好明顯。
何廣沛、郭子豪,兩個都簽咗大台親生仔約。

郭子豪

2014年加入大台之前,郭子豪(Arnold)已經出現喺報紙雜誌,因為佢係當年以剝衫壯男做宣傳嘅美國服裝品牌A&F眾多猛男之一,亦係A&F當年唯一嘅華裔模特兒。唔想淨係做model,郭子豪選擇加入無綫。家庭觀眾可能對佢無乜印象,最眼利嘅可能只係認得佢有份做《廉政行動2016》。不過大台嘅觀眾就嚟會認得佢,郭子豪喺即將播嘅《親親我好媽》有演出,宣傳片都有佢開口講嘢。

而拍咗未排幾時上嘅《三個女人一個「因」》,佢就會一口氣跳升到做第三男主角,排喺袁偉豪、陳智燊後面,做女主角黃智雯嘅老公!以新人姿態加入大台,簽埋經理人合約做埋親生仔,第三年就有咁嘅機會,真係少數中嘅少數,希望佢會有好表現,乘勢而上。

郭子豪紅褲仔加肌肉,AF時代。
《廉政行動2016》演員,左下角有郭子豪。
郭子豪唔露肉,着密實啲都有睇頭。
做得AF當年唯一華裔模特兒,肌肉唔少得。袁偉豪拍《三個女人一個「因」》時,話露肉以後留返畀郭子豪表演。

袁鎮業

第26期藝員訓練班班長袁鎮業(Kelvin),最令人記得,同埋最多戲份嘅角色,係喺《一屋老友記》飾演胡定欣嗰間水電舖兩個伙記嘅其中一位「凌波」。一路補襪一路同胡定欣分享愛情觀嘅一幕戲做得幾好,當然一眾女觀眾可能會比較記得佢喺同一套劇裡面剝衫show肌肉嘅戲份多啲。2012年入藝訓班嗰時,袁鎮業佢希望自己10年之內可以做一個有影響力、教育下一代嘅藝人。5年過去,打好基礎向目標進發都咪話無可能。

袁鎮業佢除咗係演員,仲係一位舞林高手。讀大學時已經成日參加學界舞蹈比賽。加入大台之前,仲跟過唔少歌手做演唱會dancer,包括張學友、葉倩文、林峯、鄭伊健。之前大台有條宣傳片,佢就有分跳modern dance,都幾charm。如果大台喺混戰當中開新題材電視劇,又咁啱開歌舞片,就真係開正佢嗰瓣。不過唔同何廣沛、郭子豪,佢無簽到親生仔約。希望大台唔好走寶。

袁鎮業跳舞片段《TVB創新經典節目巡禮2015 》:

袁鎮業外型係唔錯,跳舞勁好睇。
袁鎮業喺愛情網劇《好朋誘》嘅演出。
袁鎮業與蔡思貝拍攝《踩過界》。
一張圖睇晒何廣沛、袁鎮業、譚永浩、郭子豪,全部喺《親親我好媽》。

譚永浩

譚永浩(Jarryd)又係26期藝訓班嘅同學仔,同班長袁鎮業一樣無簽到親生仔約。不過早喺2004年,已經喺《四葉草2@赤沙印記》裏面出現,做女主角之一陳自瑤Yoyo嘅男朋友。點解未加入大台都有個角色做呢,我搵唔到資料呀…不過我知道佢有把好聲,仲係2010年度英皇新秀歌唱大賽嘅金咪得主!佢間唔時都會自己post啲唱歌片段出嚟,係好聽。另外,佢同另外兩位大台演員盧峻峯、董敬文開咗個facebook page叫做《喂 霞姨》,又拍片又唱歌。仲有拍「深夜IQ題」喺通宵開工時間問藝員同事IQ題,挑戰佢哋最唔清醒時候嘅頭腦。又同袁鎮業演出愛情網劇,算係最勤力利用網絡力量嗰批大台藝員。

成日post片,又喺《安樂窩》同埋《Y Angle》做主持,可能因為咁, myTV SUPER嘅facebook好多時都搵佢主持live,節奏控制得唔錯。加入藝訓班時,Jarryd話希望自己5年後似林峯咁,喺演戲、唱歌、電影都發展得好。十年之後希望喺娛樂圈佔重要地位。繼續努力,向主持發展又得,簽星夢唱歌都唔係無可能。

《2010年度英皇新秀歌唱大賽》部分片段:

譚永浩、袁鎮業主演愛情網劇《好朋誘》:

藝人應該用網絡平台自行做宣傳,譚永浩識玩。
譚永浩(左二)、袁鎮業(左三)同樣係大台26期藝訓班同學仔,兩個都無簽親生仔約。希望大台唔好走寶。
譚永浩同另外兩位大台藝員盧峻峯(右)同埋董敬文(左)開咗個Facebook page「喂!霞姨」,拍搞笑唱歌片。
譚永浩經常主持myTV SUPER嘅Facebook live。

劉俊謙

劉俊謙(Terrance)同電視界暫時最接近嘅一刻,包括咗拍過嘅唔少電視廣告,同埋拍ViuTV開台前瘋狂播放嘅宣傳片《WEIU》,又或者係佢同視帝黃子華同埋大台前花旦陳法利做嘅嗰一齣舞台劇《前度》。不過好快,佢就會以「新大衛」嘅姿態出現喺ViuTV嘅《瑪嘉烈與大衛系列 前度》當中,同廖碧兒、娘娘杜小喬合作。

高大靚仔嘅「劉謙」明顯sell暖男形象,原著《瑪嘉烈與大衛系列 前度》當中嘅大衛比《綠豆》當中嘅大衛搞鬼,劉謙一定應付自如。香港演藝學院畢業嘅佢,喺舞台劇界已經發展咗一段時間,曾經有傳媒話佢係「演藝李治廷」,我就覺得佢仲靚仔過李治廷。劉謙接受訪問嘅時候話自己想做一個舞台劇演員,亦都想做一個電視演員,不用分得那麼細。我認同呀,好戲就得,黃秋生、蘇玉華、潘燦良、劉玉翠,有辨你睇。

劉俊謙演出廣告:

《瑪嘉烈與大衛 前度》宣傳片段:

「前度大衛」劉俊謙、「綠豆年青版趙子龍」游學修、「綠豆瑪嘉烈」周家怡。其實係拍緊港台嘅《申訴》。
劉俊謙拍緊ViuTV嘅《瑪嘉烈與大衛系列 前度》,靚仔又識做戲,紅就指日可待。
都話做有趣搞鬼嘅大衛對劉俊謙係無難度嘅。
呢個笑容,劉俊謙被封為暖男係有原因嘅。
型又得!
舞台劇《前度》,同大台前花旦陳法拉有對手戲。
舞台劇《前度》,其實係同黃子華無乜對戲。

馬志威

提到馬志威(Edward),除咗演出過一系列廣告之外,大家可能會記得佢喺吳雨霏2012年推出嘅歌曲《告白》MV當中嘅出色演繹,或者佢同蔣家旻擔正嘅2013年電影《第一次不是你》。佢依家係太陽娛樂旗下藝人,2016年會同劉謙一樣,演出《瑪嘉烈與大衛系列 前度》,以「大輝」嘅角色同「新瑪嘉烈」袁澧林Angela發生一段情。

須知道上一套《瑪嘉烈與大衛系列 綠豆》除咗令到幾位主角人氣急升,亦都令到本來主力喺電戲嘅游學修、林耀聲入屋,多咗電視觀眾認識。今次《前度》,後生嘅主要男演員就只係有馬志威同埋劉俊謙。兩位有實力又有外型,如果配埋天時地利,上位無難度。

吳雨霏《告白》MV:

我對馬志威嘅第一個印象,好似係嚟自吳雨霏《告白》MV嘅呢一幕演出。
馬志威,有外型、有戲,爭一個畀大家認識嘅好機會。
電影《第一次不是你》做男主角,搭住蔣家旻,可能係馬志威畀大家最深印象嘅演出。
《瑪嘉烈與大衛系列 前度》男位後生主要男演員,馬志威(右)與劉俊謙(左),再加上文青女神Angela同埋娘娘杜小喬,唔知可唔可以接住《綠豆》嘅氣勢。
(上述相片由作者提供,文章純屬作者意見,不代表香港01立場。)