【來稿】怪獸家長遍香港 睇表演犯場規駁咀投訴：我無錯！
文：日青
眾小朋友千呼萬喚、熱切期待嘅暑假終於到喇，家長們又係時候搜羅各式暑期活動、親子節目同愛兒／女一齊參與，當中不得不提「𡃁界」文化盛事──「國際綜藝合家歡」啦！
話到明係「合家歡」，梗係有好多家長帶埋小朋友一齊嚟睇唔同類型嘅表演節目。雖然呢類型表演時間通常好短，而且無中場休息，對場地職員嚟講應該有著數，但亦係惡夢嘅時刻，因為會見到好多失控嘅小朋友同怪獸家長！講真，小朋友百厭極，見到著制服嘅職員點都會「淆一淆」，但家長就……都係貫徹一般港人嘅態度：駁咀、投訴。
真係講到口都臭，入到場真係唔可以、唔可以同唔可以影相！偏偏，家長們入場就坐後，就會即刻拎部電話出嚟喪影。影吓個台啦、影小朋友啦、影吓劇場環境啦，總之咩都影一餐！好聲好氣咁溫馨提示佢哋場內嚴禁攝影，佢哋會好似好驚訝咁問返你轉頭：點解唔影得？邊度寫唔影得？我影我個小朋友咋嘛影你個台咩！（指住其他人講）佢哋都影啦你唔話佢？等等等等⋯⋯總之就係話你知：我影相無問題，你唔俾影係你嘅錯！
先生／小姐，我想再三強調，入場前已經好大個牌寫咗唔俾影，佢到場，場刊上面都印住「為留下美好回憶，表演期間及場內嚴禁攝錄」，你唔識字我唔怪你，但我同你講唔該你聽話啦！對廣東話無反應？唔緊要，用英文講句「no photo」有幾難？英文都無反應，用普通話囉，然後佢哋又會好抵死都問你：
做咩同我講普通話，我係香港人嚟㗎囉！
哈哈，唔該晒，原來你係我同鄉呢！之不過咁呀香港人，你唔好覺得自己特別高人一等，因為你連規矩都唔識守，仲可悲過啲你睇唔起嘅人囉！
以上對話喺開場前可以重複無限次，基本上到最後只會覺得自己係自言自語同緊空氣講嘢。有時遇到啲極品家長會喺你面前駁咀。以下係真實對話：
我：唔好意思呢度唔俾影相。
客：我無呀！
我：（明明開住相機）無唔緊要，麻煩你都收一收埋部電話吖。
客：（爆seed）你話我錯呀？我無錯囉，你憑咩話我做錯！
然後佢會同佢小朋友講：
媽媽無做錯，佢無啦啦話人錯，咁衰！
我好想同嗰位觀眾講，第時你小朋友駁你咀，千祈唔好喊唔好鬧，因為佢只係有樣學樣，無做錯到；閣下用咗一個好好嘅身教話佢知，咩叫有錯都唔認。
捉影相遇到嘅「趣事」真係可以有排講，但今日除咗想講影相，仲有啲怪獸行為想同大家分享。話說有好多家長會頗縱容自己個細路，即係我知小朋友你睇show睇得好興奮，一hyper就四圍走，但不幸地，作為場地管理者，我哋嘅責任係確保所有觀眾喺安全、舒適，而且不被騷擾嘅情況下欣賞演出。小朋友走嚟走去，作為家長唔好好管束一下，到我哋呢啲著制服嘅人出聲，你唔幫口不特止，仲要一句：「小朋友係咁㗎啦！」我真係⋯⋯無話可說。
而有啲家長嘅反應係：「我叫唔到佢㗎，佢唔會聽我講。你叫啦。」見得太多，我會明白點解你位親愛嘅孩子唔聽你支笛，因為根本就係你的行為如何，你小朋友的行為也必如何。下次唔好問點解個細路唔聽話，問吓你平時有無好好同佢溝通，以身作則。
仲有一種家長係放縱型，即係佢深知個細路唔會聽佢噏，佢會借你把口教佢個小朋友：「嗱，我都話唔得㗎啦，依家畀人話喇。」然後個細路完全唔明白自己錯在哪裡，但畀一個好似好有權威嘅制服友話自己錯，都會乖一兩分鐘嘅。我真心想問所有家長，明明個小朋友係你自己，明明生得佢出你嘅責任就係教好佢，點解會變咗喺我哋身上？
好不容易等到開場，有啲家長會不太理小朋友安全，做樓座時遇到最多。須知道樓座係向下斜，你個小朋友喺度跑樓梯我見到都心慌慌，萬一叉錯腳真係會轆飛落樓下。你都唔阻止不特止，仲要話我好咁「關注」你個小朋友⋯⋯聽得太多次「小朋友係咁活躍㗎啦！」、「我個仔身手好敏捷！」，總之所有解釋嘅潛台辭就係話你知：「我無錯！」真係二萬分無奈，有咩事你唔好喊，唔好怪人無幫你睇仔／女。
記得有次一位爸爸喺樓座第一行抱個小朋友拋吓拋吓，我真心覺得危險，就溫馨提示佢：
先生，呢度比較高，麻煩坐返埋位，安全啲嘛。
爸：我個女睇唔到吖呀！
我：（睇唔到就唔好慳嗰少少錢坐樓座啦！）咁但係都要麻煩坐返埋去，因為真係好危險，大家都想開開心心睇表演㗎嘛。
爸：我本身好開心，係你搞到我唔高興囉！同埋，你覺得我抱唔起我個女咩？我晚都抱佢㗎啦！
先生，知你叻喇，知你臂力驚人喇，但有咩意外就唔好啦。大佬，你估我好想俾你無啦啦噴到一臉屁，我都係為你同你個小朋友好。有時遇到啲咁嘅人真係真心灰。
最後最後，我好想呼籲一下各位家長，買飛入場睇節目都係想好好陪吓個小朋友，開場前，中場休息時，不如放低個電話唔好掛住㩒，陪佢傾吓計、解釋吓個節目，講解吓場地禮儀，唔好咩都諗住交畀人做，場地規則我哋幫你同小朋友講無所謂，但如果個小朋友覺得無聊、因為想你注意喺度搞搞震、不斷問我哋問題、悶到要搵我哋傾計，我會覺得好悲哀，個小朋友好慘囉。
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）