【的士眾生相】表現恩愛傾婚事，女友落車即爆喊訴心聲

每個人都有真實嘅一面。曾經，我哋會唔鍾意就話唔鍾意，想講咩就講咩，那是童言無忌的年代。隨年月漸長，好多說話漸漸唔敢講出口，情緒亦變得愈來愈內斂，出街唔止化妝仲要戴面具，美其名曰成熟，實際上每個人內心深處都有情緒，都要發洩。

喺的士車廂入面，單獨面對陌生嘅司機，就成為咗宣洩情緒，吐露心底話嘅最佳出口。

曾經有一對男女乘客，由佐敦去觀塘再去將軍澳。喺經過金巴利道時，女乘客不經意地彈出幾句：

你睇下啲婚紗。

呢件做晚裝幾靚喎！

男乘客嘅回答相當有詩意：

只要個新娘幸福，就算普通婚紗，都可以着得好有福氣。

一路上，女乘客又講：

而家啲小朋友都幾誇張，你睇下，又報呢樣又讀嗰樣，我哋一定唔可以咁樣。

男乘客隨口附和幾句。未幾，經過九龍灣時，女乘客又憶述上次去飲去錯郵輪碼頭另一間酒樓嘅故事，並以「我哋擺酒要搵間容易去嘅」作結，男乘客亦適時表示要搵間合父母心意嘅酒樓。

好快到咗觀塘，女乘客先落車，我繼續送男乘客返將軍澳。

我無無聊聊又搭下嘴，祈求司機乘客關係好啲：

兄台，你就正啦，有人肯嫁你。

點知換嚟嘅唔係敷衍式嘅多謝，而係黃河式決堤！

嫁俾我？我有話要娶咩？要而家娶咩？個個都話係時候結婚，屋企人又日日畀說話我聽，女朋友頭先你都見到㗎啦，煩到乜咁。我唔係唔想結，但真係唔想而家結，唔想咁快就決定成世人。

我答佢：

師兄唔使喊呀？我撐你，你啲兄弟都實撐你㗎，條女唔啱咪撇佢囉，驚咩？你冷靜啲先，一陣去寶琳你想我喺坑口出定市中心出？

要佢分心就係最好嘅冷靜方法，等佢稍微降溫之後傾落，原來佢都三十幾歲，屋企人一直催促佢儘快結婚，近年已經去到「逢佢哋識新女就要我同佢食飯」嘅地步，令佢深感痛苦。我好自然咁問，點解唔同屋企人講清楚呢？原來佢家教一直甚嚴，人生大部分嘢都係屋企安排，包括大學揀科，所以佢有咩難題，屋企人從來唔係傾訴對象。

我問：

咁你唔同女朋友講清楚？

講？點講？唔通話我唔鍾意呢樣，唔想去嗰度咩。

又原來，佢拍拖經驗都唔多，畢業之後基本上都長期係空窗期，所以一直都無咩情侶相處經驗。難得有個緣分大到佢敢表白又成功嘅女朋友，到貨後偏偏又缺點多多，極難相處，淘寶中伏記咁。雖然佢都明白無幾多男女係一拍拖就夾，但係就算要結婚，都要磨合到先決定。

最慘嘅係女朋友係相識多年嘅好朋友，基本上身邊所有朋友都係共同朋友，佢對女朋友嘅意見，幾乎無朋友可以傾訴。

臨落車，佢似乎收到奪命訊息，佢嘅錄音回應係咁嘅：

我返到喇，而家去廁所呀，夜啲沖完涼打畀你。

畀完錢落車，我抽空回我嘅訊息，只見男乘客並未返家，而係去咗垃圾桶旁邊打邊爐。我諗佢只有吸呢支煙嘅時間，先係完全屬於自己嘅私人時間。

的士車廂入面，每晚都上演一幕幕都市悲喜劇，香港人最真實一面，或者只有互不相干嘅的士車廂內，先可以盡情顯露。從媒體中見慣了各種數字，數字背後的故事又係點嘅呢？搭上呢部車，為你一一講解。

（文章純屬作者意見，不代表香港01立場。）