員工被放假 Lancôme空城計避抗議
「東主有喜，放假一天」就聽得多，「東主怕死」都有得放假，真係鮮有聽聞。
尋日社民連、人民力量、工黨、香港眾志等政黨，齊齊叫人今日遊行去 Lancôme 位於銅鑼灣時代廣場嘅專櫃，抗議自我審查封殺何韻詩。到尋晚 9 點，Lancôme 母公司 L'Oréal Group 緊急通知喺銅鑼灣返工嘅同事，今日全部放假一天。咁即係唔止Lancôme喎，連集團旗下嘅 The Body Shop、Shu Uemura、Kiehl's、Clarisonic 等公司分店嘅員工，通通唔使返工，忽然有假期一天。
古有諸葛亮用「空城計」智退司馬懿，今有 Lancôme 照辦煮碗，算係避免咗同遊行人士硬碰硬。可惜當今唔再係帶兵打仗嘅年代，家陣講緊嘅係企業形象，Lancôme 一再縮沙，冇晒 face，仲點樣買化妝品？
成件事 Lancôme 貫徹「怕事冇腰骨」嘅形象，真係關公再世都救唔返。上星期何韻詩喺 Facebook 開心宣布，得到 Lancôme 邀請，月中喺上環合作搞一場小型免費音樂會。大家都覺得 Lancôme 夠膽搵出咗櫃又撐社運嘅何韻詩合作，有「吉士」，超欣賞。點知消息傳咗返大陸，傷盡中國人的心，引嚟《環球時報》點名批評 Lancôme 邀請「公開支持港獨」嘅藝人，內地網民要脅杯葛。Lancôme 怕失去中國大市場，急急發聲明澄清何韻詩唔係代言人。但係 Lancôme 認為割席一刀未夠喉，於是同一晚再出多一份聲明，指因「可能出現的安全因素」，取消成場音樂會，大大力斬斷同「反中亂港」何菇菇嘅一切關係。
學夏水話齋，Lancôme 喺公關上可謂自爆再自爆。咁爆炸性，當然引起中港網民激動迴響，兩邊隔空罵戰，但齊心杯葛 Lancôme。何韻詩翌日發出聲明回應，指自己堅持信念，遭 Lancôme 無緣無故單方面終止合作，感到莫名其妙，「當國際品牌也要屈膝於這種霸凌之下，我們不得不嚴肅正視問題」，要求 Lancôme 法國總公司公開交代原因。其他藝人同埋知名人士，紛紛表態支持何韻詩，而一啲「真．有吉士」嘅公司，亦即時抽水。仲有由童年開始就好有演藝細胞的「哪吒」方國珊，同時拍片加演示範用 Lancôme 護膚品洗廁所，一整個浴室的水都抽乾。不過割咗何韻詩，反而吸引李偲嫣自告奮勇，呼籲支持 Lancôme，唔通呢啲就叫做「塞翁失馬」？
事件演變成國際關注事件，中英美法日嘅媒體，都有深入報導，BBC 甚至邀請何韻詩做直播訪問。家陣 Lancôme 公關輸晒，仲被揭發用動物測試化妝品。唔單止香港生意做唔成，大陸市場亦危危乎。任你再耍三十六計，避得一時避唔到一世……
延伸行動：
做人要有腰骨，營商最緊要有原則。唔想學 Lancôme 咁成為犯眾憎，就要參考一下01博客提供嘅公關貼士喇！
至於 L'Oréal Group 旗下員工，就梗係要多多聲援示威啦，聽日就端午節，若果示威埋星期五，咪就無端端多左個 long weekend，學李兆波建議，去轉台灣玩下都得呀！