【01博客咁睇波】港中大戰太政治?都唔夠歐洲波「Dirty」

撰文:世界波
出版:更新:
成日都聽到有朋友講:「好煩呀,做咩全部嘢都要拉埋政治度呀?我想睇場波咋嘛!」……想完全唔關政治事,咁唔好睇波喇,去玩下車品下酒罷啦。
列奧C@世界波
歐國盃外圍賽期間,阿爾巴尼亞作客塞爾維亞時爆發衝突,防暴警察到場。(Getty Images)

文:列奧C@世界波

因為一間護膚品公司嘅商業決定(好似係),近日上位嘅除咗何韻詩,仲有力撐佢嘅好友,王菀之。曾經因為一句屬於我等「中產分子心聲」嘅「我討厭政治」而名聲大噪,今次王宛之為咗支持好友,再次去伸手觸碰自己最厭惡嘅嘢(不過當事人可能無諗到咁複雜。)

對於閒時鍾意坐喺 50 吋大電視前面,飲住紅酒咁欣賞 4D 高清直播嘅英超粉絲嚟講,「我討厭政治」早前都成日出現喺波友圈中嘅討論,講嘅當然係之前嘅城中熱話,港中足球大戰啦。

香港足球代表隊支持者。(資料圖片)

問世間有冇唔政治的足球

嗰陣時成日都聽到有朋友講:「好煩呀,做咩全部嘢都要拉埋政治度呀?我想睇場波咋嘛!」咪就係囉,睇場波都搞到咁複雜做咩?連播首歌都要諗佢有咩意義,快啲開波仲好啦!

歐洲國家盃就嚟開波,圍內嘅中產朋友仔都喺度討論緊,到底支持邊隊,先可以同我哋最討厭嘅「政治」完全切割呢?係「完.全」喎!

一定有嘅,歐洲喎?先進地方喎?文明之地喎?我哋曾經討論過嘅,有以下幾隊……

香港中產最愛:英格蘭

說起政治同英格蘭嘅關係,當然要提下佢聯賽入面兩隊波,列斯聯同曼聯。兩隊恩怨最早可追溯到去 15 世紀初,英國約克王朝同蘭開斯特王朝,為咗爭奪英格蘭王位嘅內戰,即係「玫瑰戰爭」。

分別代表蘭開斯特的紅玫瑰和約克的白玫瑰。(資料圖片)

當時約克郡同蘭開郡之間嘅鬥爭,令兩地人民產生強烈敵意,甚至一直延伸至現代。兩間球會嘅主場球衣顏色亦正正係當年兩個王朝嘅代表顏色——列斯聯嘅約克郡白玫瑰同曼聯嘅蘭開斯特紅玫瑰間嘅爭鬥仍然持續不斷。

國際賽方面就更加唔使講,1938 年一場喺德國踢嘅友誼賽,開波之前一班英格蘭球員「被自願」喺希特拉面前用納粹手勢敬禮,令好多英格蘭球員都覺得甚為屈辱。結果?戰意沸騰嘅英格蘭完全唔留手大勝 6 : 3。

唉!英格蘭足球「咁鬼政治」,都係唔太啱我哋咁有品味嘅人士。

【歐國盃最新動態、分析及球評,盡在 01博客 x 01Sports 歐國盃專頁!(按此進入)】

優雅技術派夠乾淨喇啩:西班牙

皇家馬德里同巴塞隆拿兩隊嘅「西班牙打吡」,一直都係我哋最鍾意睇嘅比賽之一,有人鍾意「皇家」兩個字,有人鍾意睇明星,而我就覺得佢哋身價就代表實力,實力就代表比賽刺激性。

不過,原來喺 1938 年,西班牙曾因為內戰而缺席世界盃。結果戰爭由獨裁者佛朗哥勝出,成功控制咗加泰隆尼亞首都巴塞隆拿,後來更喺當地進行血腥大清洗,一年間就處決咗數萬人。佛朗哥亦希望用足球去打壓反對聲音,甚至曾用權力,將阿根廷前鋒迪史提芬奴由巴塞強行搶過嚟。

時至今日,皇馬與巴塞仍是「世仇」。(Getty Images)

時至今日,作為當年反佛朗哥基地嘅巴塞隆拿同巴斯克地區,都仍然日以繼夜、再夜以繼日咁,爭取脫離西班牙,獨立自主。結果去到足球場,首都嘅皇馬同加泰隆尼亞嘅巴塞就成為咗對抗雙方嘅代表,西班牙球會間嘅種族及文化仇恨仍未能徹底消除。

你話喇,咁唔理性,唔怪得呢幾年西班牙成績咁不似預期啦。踢場波又要講「獨」,傻的嗎?

小國應該無咁政治化?看阿爾巴尼亞

咪以為大國國情複雜,所以先難以同政治完全切割,因為政治呢家嘢就原來無分大細。

唔講咁遠,就喺歐國分組賽,小國阿爾巴尼亞作客對世仇塞爾維亞時,就因為有球迷用無人機讓「大阿爾巴尼亞旗」在球場中央上空飄揚,然後被塞國球員扯咗落嚟,而導致雙方球員同球迷發生爭執,令賽事腰斬。上訴完一大輪後,由於仲裁庭認為係主場保安不力,結果阿國由輸 0 : 3 變到贏 3 : 0,最後更成功大炒阿美尼亞出線。當日有份保護自己隊友同國旗嘅阿爾巴尼亞隊長簡拿就毫不客氣咁話:

「而家塞爾維亞人只可以喺屋企飲住酒嚟睇我哋踢歐國喇。」
塞爾維亞球員扯下在半空飄揚的「大阿爾巴尼亞旗」,導致雙方球員及球迷起衝突。(Getty Images)

結果,連小國嘅足球,都避唔開政治嘅糾纏……

所以,我哋研究完後,都係發現歐國盃真係好 dirty,完全都唔理性獨立,好多時都會同啲咩政治、歷史拉上關係。我都係想睇場波咋嘛,關我鬼事咩?

想完全唔關政治事,咁唔好睇波喇,去玩下車品下酒罷啦。

【九位球迷博客講波經就叻,估波又如何?不如睇睇佢哋嘅心水隊伍同預測!】

(本文純屬作者意見,不代表香港01立場。)
你可能感興趣