【靈異小說．來稿】《紙紮街市》之三：無名道士

【上回提要】
（一）：「試諗下！你幾時睇過鬼片真係有鬼㗎！部作品紅硬！」
（二）：「香港地有層係手已經好好啦！你死咗！層樓咪益你老公囉！」

文：十兄弟

〈無名道士〉

凌晨四點，如果一個活人在此刻處於清醒狀態，不論有着什麼原因，都不禁在內心暗生一種被世界劃分出來的唏噓。 趁着報紙檔的嬸嬸還未下來疊報紙之前，小販必須把一切清理好並離場，把街路交還給屬於該時段的人。至於什麼時段屬於什麼人，一向都是大家約定俗成的，只要河水不犯井水，一切都相安無事。

經過一晚拍攝，文龍把雙手撐開伸個懶腰，同時慢慢步出正門鐵閘，準備回家洗澡。

「喂！老友！點稱呼呀？」小販哥哥把推木頭車推到文龍身旁，看似是有心要逗他聊天。

文龍不以為然，繼續伸着懶腰說：「我叫文龍！」

「我叫無名！」

「哇！咁似刺客名嘅？」文龍笑說。

「我對人嚟講唔係刺客，但對鬼就好難講啦！」無名輕輕蔑笑起來。

文龍聽後感到此人語帶殺氣，立即放下伸展中的手臂，小退一步。

無名表情依然淡然地說：「座紙紮街市靚唔靚呀？」

文龍聽後心驚膽跳，立即提起警戒問：「你咩人嚟？」

無名：「嗰兩隻嘢都算古惑啦！居然留你係街市……」話未說完，白貓便快速從橫築竄到屋頂，直跳到無名臉上。無名隨即反手一擋，把白貓撥到地上，再從腰間抽出鈴鐺猛力地搖。白貓發出一陣慘烈的咆哮後，石姐便從貓身彈出。

「死道士！你賣完腸粉就過主啦！講咁多把鬼呀！」石姐兇狠起來，講話都咬牙切齒。

「你地明知自己陰氣，仲留個生人係度，累死咗佢，你地罪孽加深，想投胎都難！」

「但我地都等咗好耐啦！」婷婷突然飄出來搭話。「呢個人佢自己本身都想死嘅！拍完條片，仲可能對大家都有着數，有咩所謂！」

婷婷的眼神純粹得讓無名哭笑不得。他轉頭便向石姐怒吼：「一定係你呢隻老鬼教壞佢！」

石姐一聽到老鬼二字，即怒火中燒，五指尖突揮出黑長而尖利的鬼爪揮向無名腰間，欲把那束鈴鐺扯走。無名雖人到中年，但身手依然敏捷，左右腳輕移重心幾下便連續轉了多個大圈，躍到屋頂，害石姐幾度撲空。無名見石姐來勢兇狠，突然拿出手提電話，播放一段令文龍摸不着着頭腦的錄音：「你所打嘅電話，暫時未能接通……」 石姐聽到錄音後，立即發出痛苦的叫聲，雙手抱緊頭顱，全身抽搐，直至無名關掉電話才平伏。

文龍見狀，嚇得腿軟，處在原地不敢動。

無名得勢便囂張地在屋頂叫喊着：「嘿！老友！你咪未見過大蛇痾尿咁樣啦！呢隻嘢成日想反我，跟住走佬㗎！」他轉指着正不服氣地怒視着他的石姐揶揄說：「但我就係唔明！你人都死咗啦！仲想走去邊先？都多餘嘅！」

石姐無可奈何只有繼續潑婦罵街：

「收聲啦！仆街！你係識蝦女人㗎咋！咪又係見到鬼魂誇啦啦，撞正食環小喇叭！」

鈴……鈴……無名發現腰間的鈴鐺不尋常地自動發響，轉頭一看，原來婷婷偷偷飄到屋頂企圖幫石姐把鈴鐺吹走。

無名用手按捺着鈴鐺，又從褲管的小口袋中抽中一扎鎖匙，在婷婷前輕輕一搖，便使得小妮子臉色發白，動也不敢動。無名指罵婷婷說：「你再亂嚟我就搖到抽鎖匙跌晒為止，我話你聽！ 你知啲鈴鐺用嚟做咩㗎咩？搶咩呀！」

「唔知呀！石姐話，啲鈴鐺冇晒，你就會走，你走咗，我地就唔洗再係呢座又爛又臭嘅街市度.....」

「你唔用腦㗎！」這下無名真的動惱了。「條八婆講咩你就信咩！你做人嗰陣就係大意冇咗條命，依加做鬼都咁蠢嘅！」

婷婷聽後，傷心得抽泣起來：「腸粉哥哥……石姐講得啱！你真係好煩呀……」

正當無名思考自己是否說得太過火時，四周環境突然詭異地變得肅靜，兩鬼也消失蹤影。

「先生！先生！」一把語調斯文有禮的男人聲從地面傳到屋頂。

無名往下一看，立見自己當災，當場啞口無聲。

「請問呢架木頭車係咪你㗎？」

幾名身穿食物環境衛生處制服的職員，正站在木頭車旁，一致地凝望着他，等待他的答案。文龍瞄向隔離街，發現報紙檔嬸嬸正用幸災樂禍的眼神，觀看無名被捕，大概是不爽時間到了，無名還未交還場地，所以用好市民身分報食環。

無名跟職員上車前向文龍大叫：「喂！老友！麻煩你嚟一嚟保釋我吖！我畀返錢你吖！」

結果，無名的腸粉車被扣押了，也罰了點錢，但他態度不以為然，因為都習慣了。

「嗱！老友！還返啲保釋金畀你。」無名叼着煙仔從褲袋抽出一疊濕皺而漬染污垢的銀紙，掀起幾張一百蚊小角，抽出便遞給文龍。

文龍接過銀紙，充滿疑惑地望着無名欲言又止。文龍深深吸一口煙，刻意把煙霧捉弄着玩，不停吐向文龍。

文龍不耐煩地邊徒手撥開雲霧邊道：「大師！你到底想點㗎？你咪搞嗰兩隻女鬼得唔得？」

無名由上而下打亮了文龍一遍，便用嬉笑怒罵的態度質問：「你係驚我打到佢地煙消雲散吖？定怕冇咗佢哋，你咩都拍唔到？」

文龍聽後，開始心虛得吞吞吐吐。他自問從沒認真想過這問題，反正就只想計劃順利，至於情感上自己與兩鬼之間的關係，的確是這一瞬間才開始想起。「算啦！你答唔出㗎啦！我自己都唔知自己係幫佢地定利用佢地……」無名搭着文龍肩膀，用心良苦地勸着：

「 總之你記住人鬼殊途， 仲返唔返去就你自己決定啦！」

文龍：「阿……大師呀！其實你係咪一早知道佢地係度？」

無名是位道術高明的道士，身上聲聲作響的鈴鐺是件工具，專收服因自殺而怨懣成殺氣滿盈的厲鬼。早年因殺戮太多，積了孽，一直生不了孩子，於是改道為收留剛死的亡魂，待他們化盡怨氣，再作法引渡投胎，要是亡魂冥頑不靈繼續作惡，便施於火刑，化為銷魂火， 從此灰飛煙滅。那些香噴噴的炒腸粉，有不少是用這種銷魂火烹成。2003 年中的一天，當無名嗅到怨氣殺入富豪花園一刻，婷婷便墮樓身亡，屍首正正躺臥在他跟前。當時無名的道術已經高超得輕輕一嗅，便得悉婷婷不屬怨魂，而是含冤的孤魂，便打算把她引渡到舊街市，慢慢化間孽念，好作超渡。正當無名從腰間準備抽出鈴鐺，把婷婷收納入囊時，一陣臭氣熏天的怨懣味正來勢洶洶地往他身上衝，一隻五指延出黑爪的鬼手抓向他腰間。無名機靈地往後一退，便見一隻身穿套裝，唇紅齒白且容貌嬌艷的女鬼，正 對他厲眼相看。

「你個仆街！細路女都唔放過？」女鬼出言怒斥被她誤當是殺手的無名。「佢啱啱先死！做咗咩錯事，你要收佢？」

無知見着鬼魂界也有俠女，心想事情幽默，便刻意向她逗着玩。

無名：「點稱呼呀？我收佢又關你咩事？你仲要衝出嚟俾我打？」

石姐：「叫我石姐！總之呢個屋苑係我地頭！你咪係度搞事！」

無名聽後默默一算，終於弄清楚原來那道怨氣是從這自稱石姐的女鬼而來。之後他見李英磊雖是厲鬼，但尚存義氣，便趁她還未失智時，連同婷婷一齊帶回街市。除了利用她們的陰氣鎮守着那與陽氣對沖的建築外，也順道為她們積蓄陰德，好超渡她們日後投胎。但想到始終有控制她們一段時日，便花了時間搜集她們生前的事蹟，有利於威嚇她們不准犯禁。

「咁點解你噚晚同佢打交嗰陣，唔係用咩符咒之類，係用電話同鎖匙㗎？」文龍吸着維他奶，瞪大雙眼，期待地追問。

無名吸着身上最後一煙，繼續娓娓道來：「人死咗就得返個魂魄。魂魄係一種正常人睇唔見嘅能量，而呢種能量係同做人嘅時間所講嘅思想，係連接㗎！當你係一個遊魂嘅時候，遇到生前最鍾意嘅嘢，就會增加能量，相反遇到生前最怕嘅嘢，就會負能量……」

文龍沒等無名說完，便緊張的搭話：「咁即係石姐最怕係電話！婷婷最驚嘅鎖匙！」

「妖！」無名一掌拍在文龍後腦勺，「 咪賴醒喇！你下次試下同佢地嘈交就咁拎個電話出嚟嚇吖！包你俾李英磊條八婆隊冧你好似！」

文龍撫擦着自己頭皮，扭着鼻說：「得！你繼續講。」

無名：「嗱！李英磊生前最怕就係佢老公唔聽佢電話！呢！噚晚段留言信箱錄音，就係佢最唔鍾意聽到嘅！所以一播出嚟，佢就玩完了。」

文龍：「咁婷婷又會鎖匙啲咩呢？」

無名輕嘆：「如果你留意到，我噚晚都係拎出嚟嚇下佢，冇一真係搖到啲鎖匙。佢生前成日俾大人打佢嘅……」說到這裡，無名把煙蒂掉到地上，用腳踏熄，聲音也變得低沉。「佢一聽到鎖匙聲呢，就知道有人開門返屋企，而道門一開呢，佢都幾乎會俾人打嘅！咁所以死咗之後，鎖匙聲咪變咗佢死穴囉！」

〈利字擺中間〉

夏天最可惡便是大雨過後的毒日頭。陽光把濕氣往天上吸，走在地表上的人，活當乾蒸生鮮肉，心生煩躁。

一天，門外突然來了對夫婦，男的文質彬彬 ，身穿踢死兔套裝 ，是個頭髮稀疏斑白的老人，女的看上去皮膚光滑，烏髮飄逸，肚子微微隆起，是個年輕的孕婦。

「老婆！我嚟緊就會投到呢塊地囉！」

「吓！又舊又爛，又冇冷氣，仲臭臭地，你要嚟做咩呀？」

「有咩舊咗咪換新囉！臭咪搵人洗囉！你咁勞嘈做咩？嗱！你望嗰度！」富豪伸出套上翡翠玉戒指的食指。「開間咖啡店就有格調囉！」

此情此景，躲在暗角的文龍全都一目了然，他認出這富翁就是專營地產，並身兼多間慈善團體主席的熊翁。

這晚，天空突然感性起來，為這座已被瞻仰遺容的街市嚎哭得利害。話雖如此，一眾沉迷在電玩世界中定位追縱精靈的玩家並沒掃興，在滂沱大雨中，依舊死守在街市門口等待「完全任務」。自從最近該設計程式在衛星定位中，把街市附近兩公里設定為遊戲中的「雷台」開始，每晚門外都來了一堆青年，害文龍與兩鬼的交往都要格外慎密。

因吹西風關係，雨水穿過屋頂與假天花間的狹縫， 零零落落地撇到暗角，灑到文龍臉頰上。他不耐煩地拭擦着說：「點算呢？如果呢度真係改建咗，你地會點㗎？」

石姐盤着雙手傲然地說：「冇嘢㗎！咪繼續係度囉！人間嘅改變，影響唔到我地嘅！」

婷婷：「吓！咁啲貓咪唔見晒囉！」

石姐嘮叨：「嘿！唔上啲貓身，咪直接上個有錢佬身囉！仲好！死咗咁耐，都未試過點人做嘢！到時就點佢老婆沖咖啡！」

婷婷：「咁文龍仲點拍我地呀？」

石姐不客氣地拍點着文龍頭頂：「仲拍？之前拍低咁多。等我地投咗胎再公開都夠玩啦！」

婷婷惋惜地望向文龍，期待着他回應，卻見他望着遠方側門發呆。

石姐大叫：「喂！文龍！仲咩鬼粒聲唔出？你又想出去同班癲嘅玩電話呀？」

文龍眼神猶豫地把聲線壓輕：

「出面好似有人影緊我地……」

兩鬼往外看，只見一個女生整把手機向着走廊方向，並有手指在營幕上瘋狂滑動，應該是抓到了什麼稀奇的「精靈」。

石姐繼續盤着手認真地說：「沒事！」

文龍在旁，默不作聲，只動手把攝影器材一一收執清光。

〈後期製作〉

對於影視工作者來說，後期製作就像跟戀人享受完蜜月期，務必正視生活問題嘅時刻，毛燥的心情會一觸即發。回看記錄卡中的片段，當中有着各式奇式的壞片，疊聲、錯水平、鏡頭太震、而最常出現的問題便是因頻道不對，鬼魂在鏡頭前現不了身。面對這剪輯工程，文龍這次勸導自己必須要盡量用冷靜的頭腦去完成。就當他正工作得如火如荼時，突然收到由死黨的士傳來的短訊：

「老友！你俾我嗰條片咩嚟？有個青色嘅女仔係度講緊嘢嘅？」

兩天前，的士叫文龍把之前去旅行拍的無聊自拍片傳給他。大概是太頭昏腦脹的關係，他居然錯手把記憶卡中，一條訪問婷婷的片傳了過去。

「噢！唔好意思！俾錯咗！呢條片係我之前啲散工嘅片碎嚟！」

經歷過跟最大的危險相處後，這次，文龍真係學會冷靜的處理危機。

【靈異事件？】
昨晚，大學二年級生小蜜在社交網站聲稱，在某精靈地標中，意外用手機掃到靈異畫面，在畫面所見，街市的暗角隱若出現「半個女學生」。當時她立即截圖，並假裝淡定地離開現場。誰知，回家即發高燒暈倒，需送院接受治療。
消息來源：網絡 MJ 台
請即讚好【網絡 MJ 台】

隔日，這篇上載於社交平台的發帖，連同映照出婷婷半邊身的靈異照，一天之內在香港網絡平台瘋傳，加上相片的光影被後期加工過，鬼影的部分更顯恐怖色彩，隨之便引起網民的好奇心，為街市惹來蝗蟲來襲般的人氣。

「呢度！就係網上瘋傳住咗兩隻女鬼嘅廢墟呀！」主播望着鏡頭，拉高分貝做作地說開場白。

廢墟連日被各界傳媒爭相報導，不少來自五湖四海的江湖術士更獲邀到場考察。本來了無人煙的廢墟，變得熙來攘往。由於人氣太旺盛，可憐的婷婷只有躲在紙紥街市內不敢出來，直至天黑為止。

隨着不住被撰改成多個版本的報導陸陸續續出現，多次傳出投資改建街市的熊氏集團股市開始有滑落跡象。熊翁的發言人突然在網上，發佈聲明指集團將有意與政府相討，將改建計劃進升為拆卸重建項目，進一步發展該區的規劃。

當晚，夜色顯示比平時份外陰沉，一件不可思議的怪事便隨之而來——石姐不見了。

「你地平時仲有咩地方會去㗎？唔係無啦啦灰飛煙滅呱？」文龍着急地問。

「咪得呢度同紙紥街市囉！冇啦！」婷婷幾顆淚珠盪漾在眼袋。「唔洗搵啦！」無名突然出現在街市。這次他沒有帶任何東西來開檔，雙手交叉盤繞着，神情凝重，慢慢走向婷婷說：

「呢度氣數已盡！你係時候走啦！我本來諗住等你地孽念消清，就準備送路超渡，點知最好嘅時機未到，呢度就面臨清拆危機……」

「咁我點呀？」婷婷無助地瑟縮在紙紥街市旁，身體卷曲成一團緊繃的影子。她並沒預期有人給她回應，純粹在絕望中安靜地自言自語。

「李英磊道行高，一早就算到呢日，係冇同婷婷講啫。佢個鈴鐺仲有聲，佢魂魄仲存在，我都算唔到佢去咗邊……」無名繼續嚴肅地道出一切。

文龍走向婷婷身旁，輕輕搖動了腰間的鈴鐺幾下。婷婷頓時像一隻被打了針的小貓，不停在地上滾動抽搐，並嗯呀呻吟出痛苦的聲音。

「妹妹！你係陽間嘅命數已盡。唔好留戀啦，投胎啦！」無名雙眼充滿憐憫地勸導。「你一早可以從新做人，又特登唔走，李英磊唔可以投胎，就用盡離經叛道嘅方法要再做人。」他再回頭盯着文龍說：「做人做得好地地嗰個！又日日話要死！冤孽！」

婷婷抽泣着說：「對唔住呀！但我仲想做婷婷呀！我唔小心就冇咗條命，我唔甘心……」

「走呀！」無名開始動真氣地發怒。「再唔走就煙消雲散啦！棟街市都保唔住，你都保唔住㗎啦！」

文龍聽在耳內，默默為這一切而惋惜落淚。無名命婷婷，這幾天一定要留在紙紮街內，待時辰一到，他便作法超渡她投胎。

（待續……）

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）