【專訪】「生煎皇」Oscar7年擁8間店養過百人：好彩以前畀人呃！
人稱「生煎皇」嘅Oscar（蕭潤邦），與他同期出道的人包括有，周柏豪，陳柏宇及小肥等，Oscar自2010年與唱片公司合約期滿後，毅然離開樂壇，隻身到上海吃過當地的正宗生煎包後一試難忘，決心要在香港開設屬於自己的生煎包店。老實說現在「生煎皇」的名氣的確比做歌手時的他有過之而無不及，數數手指至今投身飲食業7年的他，已經經營了8間食肆，絕對是一個成功的生意人。眼見他非常成功，其實他也有辛酸的過去，做歌手時更零收入：「當時嗰袋得廿皮，真係窮到連一個叉燒飯都買唔起」
攝影：黃國立
好多人都覺得做藝人很風光，其實很多東西都好表面，Oscar（蕭潤邦）的例子就可以話你知，當年決定不做歌手，因為背後真的有不少辛酸：「其實我童年過得好開心，爸爸做生意，當時只要我想要玩咩玩具或遊戲機通通都會有，爸爸又會用『大哥大』，但一到97（金融風暴）全部都無哂。我記得我啱啱升讀中學嘅時候真係好窮，因為無錢交電費，屋企經常畀人截電，我嗰段時間真係好唔開心，明明爸爸做生意好似幾好，點解屋企會變成咁。而我做歌手嘅年代仲激，我完全無收入。我試過企喺個台到，而下面真係有班嚟聽你嘅歌嘅朋友，但我當時嗰袋得廿皮咋（20蚊），我明白有啲嘢唔可以用錢去衡量，但我真係窮到連一個叉燒飯都買唔起，最後我決定面對呢個問題，所以我一完約我就無望番轉頭。」
他續說：「自己無做歌手後，我覺得自己無學識，無社會經驗，出去打工嘅話步伐已經慢過其他同年嘅人好多，我當時係諗究竟有咩適合我去做呢？答案係無囉！所以我當時就決定離開香港到上海，一個好似香港嘅城市。去到上海喺我住嘅樓下有間山煎包店，食完一啖之後我就覺得呢到嘅生煎包同香港嘅完全唔同，我心諗，返到香港就食唔到呢種味道，呢個又會唔會係一個商機呢？之後我就喺網上搵師傳學整生煎包，當中都見過好幾十個，有好多都係白撞，去到最終搵到個阿姐，佢一個已經退休湊孫嘅師傅，佢因為湊孫湊到悶所以搵咗份part-time做包點，佢見我咁想學，所以以5百蚊人民幣為月薪叫我幫手，仲會教我整生煎包，但我就同佢講我只要可以學師就足夠，所以未有收錢。結果學師兩年，由搬麵粉，到搓麵粉，到真係做生煎包，真係好多點滴。」
「我唔駛乞食，因為我有夢！」
Oscar自認學業成績不好，起步比其他人慢，但只要不怕面對失敗，其實夢想並不是天馬行空的想法：「我覺得無嘢係有起跑線，好似有啲人會話，你十優，你將來一定發達；相反會考0分，你將來一定乞食；我同你講我自己當時會考0分，但我暫時唔駛乞食，因為我有夢！我覺依家嘅年青人，好多嘢得個諗字，究竟佢哋又有無真係去嘗試，又敢唔敢面對失敗還是選擇去逃避呢？理想同天馬行空又識唔識分，有理想一定要捉緊，如果唔係只會變成天馬行空嘅想法，想捉都捉唔住。我初初開店嘅時候成日畀人呃，試過畀裝修師傳呃我錢，又試過有人收咗錢做嘢偷工減料，因為我當時畀現金又無單據，但依家回想，我會覺得好彩係以前畀人呃，以前我店只有3個人分別係我，我爸爸仲有我Partner，依家就唔同，依家有超過100個員工，以前畀人呃，令我依家做事會更小心，所以我有一個信念，就係唔好覺得暫時嘅失敗就係永遠嘅失敗。其實我好鍾意同年輕人分享呢個信念，因為我自己由讀書開始已經係一舊爛泥，除咗我高，所以排隊排最尾之外，我學校成績都係一樣，我永遠都係最尾嗰個，但係呢個世界就係咁得意，以前唔成功，唔代表無將來。」
談到經營「生煎皇」有沒有發生過各種「奇事」，Oscar馬上笑不停：「我哋店內有一個隔油池，隔油池內有食物渣滓，污水等等各種大家唔會想聽到嘅嘢。咁又一次個隔油池停咗，於是我打開佢chok一chok，點知入面嘅水彈哂落一個客到，講真，嗰啲水真係臭過屎！又試過因為食環署定期喺街滅蟲，真係好似睇戲咁，有過百隻曱甴湧入食店，我當時雙手用報紙，不停打曱甴，我見到幾百隻曱甴其實都好驚，不過自己生意，你唔打，唔通叫食客幫手打咩！其中最難忘就係，以前幫手送外賣到『一樓一』，嗰時都好有體會，其實大家咁辛苦都係為啖飯。」
問到開生煎包店時的點滴，Oscar表示有很多，不過最令他感到滿足是香港人的人情味：「我覺得香港係一個好有人情味嘅地方，由第一日開舖我已經感受到香港人嘅熱情，我試過有客食過我燶嘅生煎包，佢無鬧我，仲同我打氣，叫我加油，佢話雖然今次（生煎包）燶咗，但我希望下次係金黃色嘅。所以我依家開咗幾間分店甚至西餐廳，所有都唔係我行出嚟，而係一班香港人（食客）行出嚟，我唔會因此而自滿。」