同屋企人去旅行慘過食屎？ 90後少女阿Yo醒你十大貼士
廿四孝女兒阿YO，常與父母外遊之餘，亦拍攝非一般旅遊短片；經媒體於facebook轉載後，獲逾三萬「like」。
不少網民羨慕阿YO父母相當「玩得」，而阿YO早前接受《開罐》挑戰，為家人plan一次香港一日遊，考驗阿YO plan行程之餘，亦歸納數個與家人外遊注意事項。
阿YO與家人曾六次出遊，
去過日本東京、大阪、
南韓首爾和新加坡。
人拍片佢拍片，
佢就要拍段特別嘅旅遊片。
點解拍片？
阿YO笑指只為留下回憶，
不過「想睇下點樣拍得得意啲」。
咁樣擺兩老上檯？
「阿爸好興奮，阿媽都決定豁出去喇！」
三個人，就係咁，愈拍愈上癮。
《香港一日遊》行程
1. 鰂魚涌海山樓（怪獸大廈）
2. 西灣河愛秩序灣公園
3. 紅磡電競音樂節
對於有不少網民在討論區留言，
「同屋企人去旅行慘過食屎」！
孝順女阿YO唔同意，
一來父母唔挑剔，
加上阿YO抱回報心態，
無試過出事。
我細細個嗰陣佢會帶我出去玩， 而家大個咗有能力可以plan行程， 就帶佢哋出去玩。
既然多次帶父母去旅行，
阿YO同YO爸YO媽又有咩「貼士」，
可令一眾外遊家庭借鏡，
保個平安？
Tips 1：咪盡信google map
只靠Google Map plan行程？不了。
阿YO指，帶同父母外遊，
單靠「Google大神」，
「你就算plan咗都好，
可能你去到嗰下，
其實同你預期有少少出入」。
唔想去到外地先發現Google靠唔住，
最好搵多條路線作後備，
「始終你人生路不熟，
唔知嗰架車係咪真係去到嗰度」。
TIPS 2：有溝通 唔會盲中中
多次帶父母外遊，
阿YO認為行程中
最重要是與父母有良好溝通，
了解父母想法，
亦主動向父母講解行程。
「呀爸呀媽唔知你究竟去邊,
咁我就自己一味喺度諗嘅時候，
大家就會無共識」。
YO媽亦同意溝通相當重要，
「一啲地方要行得比較遠，
咁佢比咗個意見我哋，
睇下我哋承唔承受到」，
阿YO之後再根據兩老的意見修改行程。
有商有量的行程，
減少兩分爭執，
增添幾分和諧，
大家都贏。
Tips 3：了解父母興趣
同父母去旅行，
當然可以加入自己喜愛的景點，
但必需要知道，
大部份景點需以父母興趣為先，
「要問下佢地想去邊度」。
畢竟，你係帶緊佢地去旅行。
不過，父母們都可以主動講出自己興趣，
YO爸直言之前去旅行，
亦會說明自己想參觀神戶「鐵人28」紀念人像。
唔使估估下大家想去邊，
旅程更稱心滿意。
TIPS 4：要求高 盞傷心？
「講嚟講去點樣plan法呢，
我哋都係抱住三個字㗎啫，要求低！」
YO爸笑說。
人老心不老，
YO爸認為有子女陪伴外遊已是一件美事，
「好求其㗎咋我哋」。
YO媽亦指，
「未去過嘅地方就係新鮮」，
計劃中的景點可成功到達已經好滿足。
YO爸亦特別提醒一眾父母，
「我哋上年紀嘅，亦唔好太過苛求！」
TIPS 5：父母心境亦要變
YO爸YO媽指，
一把年紀去外遊，
心境亦要保持年輕。
即係點？
「即係個心境唔好覺得自己幾廿歲喇，
去老人院喇咁樣，哈哈哈哈哈」。
遇上新式景點或遊戲，
不妨對自己說聲「好新奇喎，OK喎！」
打開心靡，
接觸下新事物。
阿YO指，
過往曾在日本行錯路，
尋找路線時經過日本傳統民居，
「即係你睇小丸子見到嗰啲屋」，
兩老亦臉帶興奮自拍，
不致因行錯路而影響心情。
YO爸亦都覺得，
身為父母不應「擺款」，
「唔好郁啲就話『我係你老豆呀，下！搞錯呀！』咁樣」。
YO媽就覺得，
只要父母信任子女，
「而家佢大個女，
就佢帶返我地去旅行，
信任得過佢嘅,，
就畀佢搞！」
TIPS 6：互相遷就
互相遷就，驟眼睇老土到喊，但時時都實用。
除咗後生仔遷就父母，
父母亦都要遷就後生仔。
YO爸指，
「有陣時諗返佢哋角度、
佢哋想睇嘅嘢，
我哋要陪佢，
但更加希望後生嘅，
就企返喺我哋嘅立場，
睇返我哋想睇嘅嘢」。
YO媽亦笑言，
「大家咁樣，
咪一個凹一個凸，
咁樣併埋咪OK！」
TIPS 7：Plan行程勿太chur
後生仔去旅行，
總喜愛「跑station」式編排景點，
務求榨盡旅程每一秒。
不過帶父母去旅行，
始終他們體力有限，
每日去三個地方已是極限，
與其走馬看花，
不如同父母一齊慢慢感受文化、
享受景色。
除咗唔chur，
YO爸覺得編排行程時亦要留意天氣。
遇上較熱的日子，
最好在室外活動之間安排室內活動，
令父母「有得涼吓冷氣坐下」。
同樣地，
你也不希望兩老在寒風凜冽之下，
在戶外步行數小時吧？
TIPS 8：搵地方坐低食飯
年輕人遊日本、
韓國及台灣，
都不愛安排正餐時間，
寧願到便利店或夜市「掃街」解決。
阿YO指，
與父母外遊不建議「掃街」代替正餐，
要「搵個地方坐低食飯」，
確保家人吃得飽之餘，
亦可以讓父母稍作休息，
「人又叉電，手機相機又可以叉電」。
TIPS 9：酒店最緊要方便
去玩住邊好？
阿YO指自己較多選擇酒店，
因為酒店地點通常比較近地鐵站、
公共交通交匯處及旅遊景點，
玩樂過後都不用舟車勞頓才可休息。
唔使嘥氣力之餘，
亦都唔使嘥時間。
TIPS 10：唔揀廉航
飛機票平當然好，
但廉航就未必啱同父母一齊搭。
阿YO指，
非廉航通常包埋行李及餐膳，
讓父母有更好的飛行體驗。
加上日本、韓國等熱門旅遊地點，
機程動輒四、五小時，
「廉航啲位可能就比較窄啲，
咁其實都唔想佢哋去得咁辛苦」。
至於廉航，
留返同friend去旅行先搭啦！