【白色強人】朱智賢首孭重戲有壓力　要狂背劇本：我諗要去自修室

《白色強人》好快就開拍，今次劇集有郭晉安、馬國明、唐詩詠和李佳芯擔綱演出，卡士真係十分強勁。除了留意主角之外，一些配角也不容忽略，朱智賢(Ashley)便是其中一個。

在這部劇之前，Ashley在TVB已經有九次拍劇經驗，不過只有今次是戲份較多，在接受《香港01》訪問時，她說：「我當係第一次拍劇，之前都係客串多，今次真係第一次咁重戲份，都相當大壓力，尤其是對住咁多前輩。我已經將劇本睇完又睇，吞晒落肚㗎喇，我一得閒就會睇，沖涼都會諗住。我想做戲嗰陣兼顧少一樣嘢，當背個劇本耳熟能詳嘅時候，就可以專注發揮演技。不過講起背劇本，我一定要搵個地方坐喺度，唔可以瞓喺床睇，以前讀書溫書成日忍唔住睇電腦，而家就變咗睇電話，我諗下次我要去自修室。」吓？去自修室咪更加專心唔到，隨時引來一大班粉絲喎！

話晒叫第一套，心情準備好未呢？無論做任何事都好，第一次通常都係興奮之餘帶點緊張，她都不例外：「一邊好緊張但又好期待，因為我想拍劇好耐㗎喇，所以我一收到消息真係好開心，但開心完就開始緊張。希望今次第一套劇可以俾觀眾見到我另一面，唔再係剩係識做主持嘅朱智賢。」至於劇入面的角色，Ashley 表示跟現實的自己十分不同，她說：「我個角色係一個新聞總監，啫係全部人都要聽我講，因為個電視台好大，新聞嘅影響力又係好大，咁我就會運用我嘅權力去做嘅嘢咁。個角色同我真人性格好唔同，我平時嘻嘻哈哈㗎嘛，但我睇晒成套劇本都無一場要笑。」好想快啲睇到一個冷艷嘅朱智賢！不過套劇而家先拍，相信好大機會要下年先有得睇，大家等吓喇！