傳王浩信陳自瑤離婚 朱千雪李佳芯：希望佢無事
撰文：賴家杰
出版：更新：
今日有報導傳出陳自瑤（Yoyo）頂唔順老公王浩信風流性格而提出離婚，但兩位當事人雖然仲未澄清，但大家都誤信以為真。今日兩位曾經與王浩信合作過嘅女星，朱千雪同李佳芯（Ali）出席活動時，都逃唔過被記者追問呢件事。
今日有報導傳出陳自瑤（Yoyo）頂唔順老公王浩信風流性格而提出離婚，兩位同王浩信可作過嘅女星朱千雪和李佳芯，今日出席活動時，被記者追問知唔知情。（賴家杰攝）
Ali表示都係剛剛知道此事：「我想我暫時都唔會去騷擾佢先，我想佢哋要有勇氣去面對佢哋之間嘅問題，可能嚟緊佢哋都會有回應，所以我都唔方便評論。」不過早前Ali都有與王浩信一齊岀席活動，唔知道當時佢心情有冇乜嘢大起伏？Ali回應話唔覺得佢心情有咩異樣：「上幾個Event見到佢就話自己放緊假，我見佢精神咗，都希望佢冇事。」
Ali指自己都唔太方便評論。（賴家杰攝）
而另一位都同佢合作過拍劇嘅千雪，就話唔太清楚發生乜事，不過千雪就話希望大家可以畀啲空間當事人：「我想呢方面佢嘅家事就自己處理啦，但係我知道佢好錫家人同好錫佢囡囡，希望大家尊重佢嘅私隱。」除咗Ali最近有見過浩信，千雪工作上都有見過佢，千雪表示見到浩信唔似有心事：「最近我見到佢都係工作，但我見佢都冇乜事，我覺得佢心情都好好。」
千雪希望大家尊重王浩信同Yoyo 私隱。（賴家杰攝）