反對群育學校做鄰居　中學校長被千夫所指

學曾鈺成話齋，做錯嘢最佳回應策略係及早道歉，「對唔住」3 隻字足以化解一場公關災難。但係有時候，道咗歉都唔等於事情就咁完結，今次「群育學校搬遷爭議」就係一例。

是咁的，東灣莫羅瑞華學校位於大嶼山石壁水塘嘅舊校舍，用咗 50 年，日久失修、地點偏遠，於是教育局計劃將成間學校搬入去（冇咁偏遠嘅）屯門，搵塊空地建新校舍，而家等緊立法會批准。但新址隔籬嘅仁愛堂陳黃淑芳紀念中學校長蔡國光，日前去信立法會表明反對，唔歡迎新鄰居。

都是身分的爭議。事關東灣莫羅瑞華學校係全港7 間群育學校之一，專收一啲有適應困難、情緒障礙或行為問題嘅學童，比普通中小學，多啲社工同心理學家嘅支援同埋輔導。不過學生通常係短暫入讀，待適應到社會環境，就會重返主流學校。

咩話？未聽過「群育學校」？好正常，因為佢哋好低調，即使 7 間有 6 間都喺市區，除咗參加社區活動探下老人家，甚少同社區產生摩擦，自然冇乜新聞可報。

但喺蔡校長眼中唔係咁睇。佢喺畀立法會嘅信件中，形容群育學校嘅學生係黑社會、會吸毒、邪教、性濫交……怕呢啲「問題學生」會影響社區，仲搵教師同區議員聯署。

有聯署又點？咁嘅言論，全城嘩然，紛紛反問：一校之長點可以帶頭歧視有需要嘅學生？

於是，一輪一呼百應的公民行動自發展開了：不同學校校長、社工、區議員、市民各自去信立法會支持遷校；特殊學校前校長陳國權甚至發公開信畀蔡校長，毫不客氣問：「請問你是辦教育的嗎？」食衛局局長高永文都忍唔住話對群育學校被誤解，「感到痛心」。

蔡校長心知「瀨嘢喇！」急急發新聞稿，澄清之前對群育學生嘅描述，都係引用自教育局文件咋，係衰在引用唔周全，「表示深切道歉」。

嘩，你咁講，即係將個波踢番畀教育局啫？！吳克儉仲唔快快割席？今日佢同記者講，只怪「有學校」文件，只引用「當中最嚴重和極端的例子」，致令「以偏概全，產生誤解」，並表態支持遷校。

「別在我家後院」的自私，又何止一例？「特殊學校」遷校遇上阻滯亦非首次。2009 年，正生書院申請搬入梅窩廢置校舍，同樣遇到當區居民好大阻力，一班正生仔女悽慘痛哭的畫面，依舊歷歷在目。可惜正生結果還是遷不成校。大家都話要關懷有需要嘅學生，但一要做鄰居，就耍手擰頭。唉，唔通要所有特殊學校搬晒去堆填區？

哎呀，對唔住呀，唔記得咗，起堆填區正正係另一個「別在我家後院」的典型例子！！

 延伸行動： 
少一點冷漠歧視，多一點熱切關懷，對任何學生都一樣重要。點樣關心？聽下我地 Blog Jamming【群育學校：別在我家後院？】嘅博客點講？