姜濤孖MIRROR兄弟Anson Lo江熚生掘金　過千粉絲迫爆置地

男團MIRROR人氣爆燈，深受各個品牌愛載。今午三位成員Anson Lo（盧瀚霆）、姜濤與AK(江熚生）合體掘金，現身時裝品牌喺中環置地廣場嘅Pop Up Store。

活動下午三點開始，但難得偶像現身，有「姜糖」今朝7點就去到商場霸靚位，未到12點，已經有逾千粉絲企滿商場各層，到三點左右，場內嘅「姜糖」、「神徒」以及「生粉」不時大叫偶像嘅名字打氣，十分熱鬧。

喺過千粉絲呼喚下，姜濤、AL及AK終在三時四十 分、由數十名保鑣簇擁下現身，沿途不停點頭打招呼。進場後，三人除不時拎起新產品影相，之後又各自在品牌的佈景版前擺出型仔甫士，十分專業，而在影相期間，三子亦盡量與粉絲打招呼，又一齊跳舞帶動氣氛，十分識做。由於今日活動未有安排任何媒體訪問，所以三子影相後做離去，全程逗留約十五分鐘。