【婚姻合伙人】楊明曾犯醉駕刑毀 捱18年終坐正：錯失好多機會！
楊明自2015年《收規華》做第二男主角，開始備受關注，今次在新劇《婚姻合伙人》（原名《抱佣情人》）更首次擔任第一男主角，與高海寧將會有感情線。他開心之餘，又感到有壓力：「要多謝監製同編審，咁大膽畀機會我去試」做到主角當然開心，但對於楊明來說，入行18年，現今擁有這位置，要多謝過往的經歷。
楊明初入行時，形象比較貪玩，常被傳媒影到他去夜蒲，他也承認初出道的日子出去玩過，過得有點瘋狂，想法上也較為急進，「啱啱係訓練班出嚟，就好想一嚟就做男主角，要做重要嘅角色。」直至出道幾年後，楊明負面新聞不斷，公司忍不住下令要他重讀訓練班，他才意識到自己錯失了不少機會，「自己當時確實會唔開心，因為唔識得點樣去珍惜，機會一直都有，但因為唔識諗而無去把握。」
因為年少氣盛，後來楊明更因刑事毀壞而惹上官非，他的事業也因此要擱置。直到07年，高層樂易玲下令安排楊明重讀訓練班，史無前例地成為首位「讀兩次訓練班」的藝人。工作了近10年，又要還原基本步，回想那段日子，楊明坦言面對如此安排，都是欣然接受：「其實個時我都好聽話，接受咗。只係初頭入到去一、兩個星期都真係幾辛苦，成日都會遲到，返到課室又會坐埋一二邊，因為開頭都係帶新同學參觀電視城，自己又已經做咗幾年嘢，會覺得好無聊。」再入訓練班，會否受過同學投以奇怪眼光？楊明就話：「我諗同學都會明白我嘅情況，佢哋都有鼓勵我，好似張頴康、阮兒、馬貫東都好好，好快就打成一片。」再讀訓練班時，楊明是零收入，需要閒時兼職做模特兒來幫補生活。
重讀生涯漸久，楊明亦慢慢想通了，重新投入訓練班生活：「自己會諗到公司見到我咁，都依然畀機會我留喺度，加上兩次訓練班老師都唔同，學到嘅嘢都唔同，所以嗰時諗通咗都去努力做。」
讓楊明堅持的理由，還有身邊的同事，楊明表示：「重讀完訓練班之後，開工遇到師兄，佢哋都話公司對我好好，如果換轉第二個做錯事，一早都冇得留低。」所以楊明非常感激那段過去，「如果唔係經歷過嗰段低潮，自己大個咗都仲會好自大，個段時間令我充分去反省，要好好去努力。」
人生冇乜幾可會有take two，所以楊明都要多謝高層曾勵珍的不離不棄和支持，珍姐扶持他那段日子，楊明表示呢一世都會記住：「記得重讀完訓練班，就上咗珍姐間房，佢問我仲想唔想做，我就話想。之後佢就開始安排我，由淺入深咁，逐少逐少安排我做唔同角色，而家就會明白，不論做咩角色，每個角色都好重要。」所以楊明覺得今日登上男一之位，不會覺得自己好勁，會繼續虛心學習。