【同盟】無綫海報又自爆終極大佬？　疑似Boss話：總之唔講得啦！

《同盟》下星期三大結局，追開的觀眾，應該估緊邊個係終極大佬Rainman，其實都不用估，因為無綫擔心大家估不到，所以一早在宣傳海報透露，在《同盟》第一輪宣傳上其中一張海報上，見到一個人擺了一個隻手遮天的姿勢，雖然整個都是黑影，但不少網友單憑黑影輪廓已估到邊個，因為覺得黑影人塊面好肥，面形和林子善有九成相像，所以網友們都幾肯定林子善是Rainman，而林子善接受《香港01》時說：「er........監製話狗咬都唔可以講呀，對唔住，大家繼續睇咪知囉，（網友話個黑影係你）我幾時有影個張咁嘅相呀？哈哈，（面型好似你喎）係咩？唔會呀，總之唔講得啦。」

劇集有神秘感，讓觀眾估下有追看性是好事，但無綫宣傳部，永遠都自我劇透，好像上年《城寨英雄》開播初期，沒有人想到歐瑞偉飾演的楊竹鑾是final boss，但官網竟然流出歐瑞偉被拳佬、牙佬的夾擊的發相，真係唔該哂，雖然《同盟》海報劇透了疑似林子善是終極大佬，昨日一眾演員亦出席「誰是final boss」活動，林子善、張國強、梁舜燕、羅樂林、江美儀、歐瑞偉，都一字排開坐在台上，林子善真係呼之欲出，不過劇評人游大東就話終極大佬，另有其人，不是林子善，嘩！大家拭目以待喇。

林子善是不是final boss，就好快知，不過他為了演好這個角色，下了不少苦功，他說：「原本呢個角色唔係我做，但監製揾我，我真係好多謝佢，因為我以前啲角色，大家都見過哂㗎喇，我自己都想突破，呢個角色我以前未做過，好複雜，奸得嚟好深沉，嗱！我冇講我係final boss呀，但我為咗做好奸角，就算套劇冇我場口，如果我知有郭鋒、鄭子誠拍，我都會留低喺廠偷師，就算有其他前輩做戲，我好多時都留低睇下，睇下人點做，咁先可以進步囉。」嗱！呢啲咪有heart囉，雄爺你係得嘅！