【黑暗對峙．影評】一代偉人同普通人一樣　都有懷疑自己嘅時刻

近年拍人物傳記片，似乎唔興由出世講到死，反而係興集中一兩件事講。Ashton Kutcher演蘋果教主Steve Jobs套《Jobs》，由讀書時代講起，普遍劣評。 之後另一套《Steve Jobs》，Michael Fassbender演教主，只拍三場發佈會，口碑就好好多。Helen Mirren演《英女皇》（The Queen），只集中講戴安娜死後一段日子，《皇上無話兒》（The King's Speech）亦只講英皇佐治六世治療口吃。

同樣係英國史，《黑暗對峙》（Darkest Hour），就只拍邱吉爾臨危受命做首相，最初返工大半個月嘅事。偉人即係偉人，換着我同你返工大半個月應該仲研究緊公司附近有乜好食。

首先搞清楚，香港宣傳海報寫「英國傳奇首相邱吉爾vs希特拉事蹟改編」，夠晒誤導。希特拉對白都冇，cameo有幾秒，情況好似話睇皇馬vs巴塞，但只係睇到皇馬賽前熱身。入場諗住睇邱吉爾帶領英國抵抗納粹，sorry， 你買錯飛。

明白呢點，就知道有人去鬧「冇講邱吉爾點抗敵」，完全係捉錯用神，同你去話點解《飛鳥俠》（Bird Man）冇超級英雄，點解《樹大招風》冇三大賊王合作冇槍戰一樣，只怪你唔做功課。

Darkest Hour固然係邱吉爾用嚟形容嘅詞，但片名應該用另一個方法理解：Darkest Hour唔只係「英國民族到了最危險的時候」， 更加係指邱吉爾倉猝上任，自己都懷疑自己，想過放棄。係佢既黑暗時刻。

呢個亦係套戲嘅主題，入面唔係一面倒講邱吉爾點英明神武料事如神。相反，戲中嘅邱吉爾絶對唔係咩完人——但呢個正係史實。

邱吉爾嘅私生活，人所共知，冇所謂劇唔劇透。冇讀過嘅，本片話你知：佢愛酒如命，日飲夜飲，坐軍機都要飲，亦鍾意食雪茄，一日十幾支。唔止，佢仲鍾意食最唔健康嘅英式早餐，煙肉煎蛋，日日食。佢亦鍾意開夜，然後瞓到好晏，仲係大肥佬。相反，對面海嘅希特拉，律己甚嚴，唔食煙，少飲酒，愛動物，好長期係素食者。如果停留在咩「自己生活都管唔好邊有資格管國家」嘅，邱吉爾應該人人喊打。

邱吉爾此人，講嘢霸道，傲慢無禮。唔止，佢仲會舉反V，換着而家已經係公關災難。佢更加係離地之極，冇坐過巴士，冇排隊買過麵包，唔會知粟米斑塊幾錢，當然唔會識用八達通或者蠔卡。唔止，佢仲三次轉政黨，冇乜政治倫理可言。但正係呢個變色龍煙鏟酒鬼大肥佬，帶領英國抵抗外敵。

所謂嘅Darkest Hour，係邱吉爾自己都懷疑自己企錯邊。人前佢夠晒霸氣，拍枱掟嘢，有佢講冇你講。但私底下嘅佢，其實淆底非常。佢力排眾議，主張開戰，但局勢發展同佢預期中好唔同，身邊嘅政敵想跣佢，佢自己都開始質疑自己，其實係咪應該堅持開戰？係咪諗錯咗？不如都係聽人講，和解啦。

電影正係話畀大家知，一代偉人都有懷疑自己嘅時刻。其實好正常，德蘭修女一樣都有信心危機，佢都有懷疑過自己嘅信仰。呢個年代我哋睇到嘅史料太多，唔會再信「神化」嘅偉人，反而係偉人軟弱嘅一面，先畀我哋覺得佢哋更加有血有肉，唔係雷鋒一類嘅樣板英雄。有冇留意，近年美國嘅超級英雄片都係咁？眾多超級英雄唔再係聖人，反而係問題多多嘅人，黑暗面多好多。

但正係咁先令觀眾記得。觀眾在職場打拼或搞生意，正常都會好似邱吉爾咁畀人圍插，自己都懷疑自己，去到嗰時你就會諗起：其實邱吉爾德蘭修女都試過咁，冇乜大不了。片中邱太嘅一句"You are strong because you are imperfect。You are wise because you have doubts"，就係點題句子。

明呢個主題，你就會識得欣賞套戲，至於加利奧文嘅神級演技好多人講過，我就不再重覆。

要彈嘅係乜？要彈嘅，其實係劇本。真人真事都有得彈劇本？就係彈佢老作嘅事。當然劇情片唔係紀錄片，創作本身絶無問題，唔好下下歷史癖上身。事實上邱吉爾位秘書Elizabeth Layton係1941年先上任，係戲中事件嘅整整一年後，所以邱吉爾帶佢去地圖室之類，完全老作，但無傷大雅。

【編按：以下內容或含劇透，逃生門在此。】

但，片尾講邱吉爾信心危機爆煲，好彩得到英皇佐治六世嚟支持佢，叫佢「聽下人民點講」，然後邱吉爾走去「落區」，坐地鐵，聽英國人民講。最後返去改變主意，你班精英誤國，識條鐵，人民個個都唔怕開戰唔會投降，人人拍手，搞掂，散場。

好可惜，呢幕成幕都係創作。一幕咁關鍵嘅戲完全創作，就令人有啲奇怪。史實係邱吉爾說服到班精英（包括戲入面被妖魔化嘅，上任首相Chamberlain以及想跣佢嘅外相Halifax）支持開戰，至於坐地鐵嘅人諗乜，就唔係邱生研究範圍了。

（本文純屬作者意見，不代表香港01立場。）