寄生蟲入腸必須通過糞便傳播　徐加晴崩潰 ：醫生話我食咗「屎」

徐加晴今日（8/9）抱病出席港台「職安健常識問答比賽2018」。同場有歌手劉浩龍、鄭俊弘、吳業坤、戴祖儀、菊梓喬等人參與。加晴表示較早時，同朋友去餐廳食錯嘢。「攪到依家仲未好番，仲要覆診睇醫生食藥，會不定時攪肚痛要去廁所，全面影響工作。」

病咗成個星期都仲未好番，追問之下，現實原來咁殘酷，加晴一一道出真相，連佢自己都無法接受呢個事實。「當日同經理人、結他手一齊去咗灣仔食上海嘢，食完嘢之後，大家不約而同返到屋企都好頭痛同不停肚瀉，因為第二日要做嘢，咁我就不停咁食止瀉藥。到第二日做完嘢，頂到夜晚返屋企，我係屙到第二朝早上六點鐘都喺個廁所度，頂唔順入咗急症。之後醫生報告出咗，話俾我知一個殘酷事實，醫生話：『你唔係普通嘅腸胃炎，係寄生蟲入咗腸，我做咗十幾年都未見過呢個個案，可以咁講俾你知，寄生蟲唔會通過口水皮膚接觸感染，喺必須經過糞便食用後，先至會感染到。』我聽到之後完全崩潰，咁即係話我當日食嗰餐飯，我係將帶有糞便嘅食物食咗落肚，而家完全對食物都冇晒胃口，有好大陰影。」