趙善恆渣馬前左腳拗柴 笑言想追周潤發拍片︰睇下佢會唔會發脾氣
撰文:莫匡堯
出版:更新:
荷里活賽車傳記電影《法拉利》(Ferrari),今日(16日)在香港舉行首映禮,邀請一眾嘉賓及愛車藝人出席。其中,集導演、演員及樂隊ToNick主音於一身的趙善恆亦有出席,並於首映上接受傳媒訪問。趙善恆受訪期間分享自己為備戰本周日舉行的馬拉松賽事期間,不慎弄傷左腳,但仍然希望休養過後堅持完成比賽。
趙善恆受訪期間,透露自己正在備戰本周日舉行的馬拉松賽事「半馬」項目,他感謝外界關心自己的傷勢,分享指:「我因為早一日練跑,跑咗人生第一個15K(公里),可能休息唔夠所以差錯腳、拗咗柴囉!」坦言無論如何都會影響賽事表現:「條筋有啲壓住。」但已盡快求醫:「醫生就話關節就冇事嘅,但係條筋有啲瘀血,頭先盡量幫我捽散佢。佢話小心啲啦,同埋就嚟渣馬,佢間診所都有好多生意,都正常嘅練習好容易受傷。」
趙善恆笑言醫生本身亦是跑手,表示受傷為正常情況。恆仔分享指非常渴望完成賽事,亦盡量在飲食與休息裡回復狀態:「我會出席嘅,既然報咗名就盡力完成佢啦!」恆仔得知周潤發亦會參與半馬賽事後,笑言會追住發哥:「跟住佢跑囉!捉住佢全程逼佢拍Vlog(影片日誌)咁囉!睇下佢會唔會發脾氣!」