【鋒味】 Jackson@GOT7任嘉賓　自爆五年級偷親女生遭停學

廚神謝霆鋒（Chef Nic）主理的《鋒味》最新一集搵嚟GOT7的香港成員Jackson王嘉爾做嘉賓，面對「細細個就已經好鍾意」嘅謝霆鋒，Jackson全程十分之興奮，除扮鬼扮馬迎接偶像之外，又建議惡搞對手，哄得霆鋒頻頻露出難得一見的笑容。由於今集係要將澳門的平民美食如：馬介休、葡國雞、魚蛋化為高級美食，所以比賽前夕，霆鋒同Jackson走訪大街小巷搵靈感。
 

霆鋒同Jackson小時候都係讀國際學校，所以當講起學生時代的頑皮史時，特別投契，而Jackson更自爆曾被停課，原因係上堂時鍚咗女同學一啖，而當霆鋒聽到Jackson話自己當時只係五年級時，一臉不可置信的模樣，但亦不忘大讚Jackson其實係一名乖小孩。

霆鋒和Jackson之後一齊坐貢多拉船，船夫「惡作劇」搖晃船身，Jackson扮驚豬，縮到霆鋒的懷中求安慰，霆鋒交足戲安慰，默契十足。Jackson全程將霆鋒捧到高高在上，哄得對方十分高興，但當霆鋒為冠名廣告錄對白時，或者係太想在粉絲面前表演得更好，結果連番NG，手執貓紙嘅Jackson即時忍不住大笑，結果搞到霆鋒忍唔住講咗句：「去你的」，之後更叫Jackson講出同樣的冠名廣告對白，非常好笑。