【関西攻略】杜如風帶團遊九州索價13888　坐廉航仲要趕足3日鴨仔

臨近新年，夜晚打開電視都會見到旅遊達人杜如風主持《關西攻略》，帶大家去京阪神。不過，最近杜如風本人宣傳復活節將會帶團到九州四日，盛惠13888！仲未計其他附加費，有網民就諗住望下個行程有咩特別，發現有啲細節位，似乎唔係好抵喎！

首先就係坐嘅航班，旅行社就列明係坐UO2804同UO2805，據知UO字頭嘅航機就係廉航香港快運航空。有網民就質疑團費$13888，但就只坐廉航，似乎食水幾深。不過就有網民分析，團費咁貴有部分並非來自杜如風，而是酒店及交通費比較高昂。好似在第二及第三日的行程，兩日均入住溫泉酒店，都比一般酒店貴。加上熊本前往福岡，再去由布院，最後返回熊本，全部均是長途車程，如果到當地買「全九州版鐵路周遊券」，3日券都要15000yen（約1016港元），都係比較貴，所以收費13888都有合理原因。

不過，價錢一回事，行程安排又是另一回事。4日團裡面，只有3日係玩。頭三日行程非常趕急，首先早上7點上機，約12點到熊本，精神都未養好就要趕行程，晚上就要坐2小時JR到福岡，由南到北，應該是會累趴。第二日由福岡出發，再坐兩小時車（最快）到由布院，算是相對較輕鬆的行程。第三日在由布院離開，再返回熊本…最後第四日晨早11點45分飛機返回香港，即是7點多起床，9點左右到機場Check in…這個團其實是在辛苦自己，可不福岡去熊本返？而且有網民表示3月29日去熊本，4月1就走，分分鐘櫻花都未開，已經蝕晒。

這個團的重點，當然有杜如風帶團。不過細心看行程表最尾位置，就會發現有兩句：「若杜如風小姐因個人身體狀況或其他不能預見因素導致未能隨團，客人不能藉此退出，敬請見諒。」、「杜如風小姐每日隨團之時間，以當日安排為準」，換句話說，首先杜如風不會一齊搭飛機，二來她出現的時間可早可遲，隨心所欲，出場時間可以短到say個hi就走。有網民就因為咁，所以都話：「不了！」、「自由行仲好喇！」其實3日玩晒全九州真係好趕下，團友真係要有心理準備！