【翻生武林】雪妮愛足半世紀　老公日日管接送：佢話陪到就繼續陪

無綫《翻生武林》除咗有估佢唔到嘅劇情，仲有一段段教人錐心刺骨嘅戀愛，唔單止係講緊黃智賢、簡慕華呢啲主要角色，就連配角嘅感情線都係好令人有感覺。好似「玉女派掌門」雪妮、「純真派掌門」張國強呢Pair因愛成恨嘅仇人咁，喺度劇裡面佢哋當初係諗住私奔，只係有人從中作梗，搞到佢哋各自去咗另一度等對方，最後雙方都嬲咗對方幾十年，即使知道真相，但所有嘢都已經冇得返轉頭。

雖然雪妮姐嘅劇集裡面所經歷嘅嘢相當令人惋惜，但現實中佢卻與武師出身嘅老公唐佳多年來都如膠似漆，今年仲係兩人結婚嘅49周年添！而佢哋兩個嘅愛情故事，其實都好有小說Feel，而且仲勁過蔡少芬同張晉嘅經歷。依家72歲嘅雪妮姐喺60年代其實係數一數二嘅花旦，入行短短七年就已經拍咗40幾套戲，而且佢嘅《女黑俠木蘭花》更加係經典中嘅經典，但到咗1969年佢就放棄哂所有事業決心下嫁唐佳，自此之後專心相夫教子。

一個事業如日中天嘅女演員為咗愛情可以去到呢個地步，就算用今時今日個標準睇其實都好勇敢，而其實雪妮姐係比大家想像中更加敢愛，佢接受《香港01》訪問時就咁講嘅：「我係有咗BB先至結婚，而且有嗰時我先生係唔知，到我好朋友，即係依家講嘅閨密啦，話畀佢知佢先知，仲問佢對呢件事有咩態度。雖然係咁，我嫁畀我先生呢件事，我係諗得好清楚，因為我知自己係點嘅人，可能係入行早所以諗嘢比較成熟。」

有啲人或者會覺得奉子成婚嘅婚姻關係唔會有一個美麗嘅結局，但雪妮姐同佢老公就係一個實證，話畀大家聽世事唔係咁絕對。問下年就係金婚嘅佢哋係點樣可以愛咁恆久？雪妮姐就話：「其實我覺得我哋好似一般市民咁咋，都會有拗撬、唔同意見，但永遠過一日半日就大家變返OK。不過以前真係會嘈多啲，好在佢返工好忙，一日做成十幾個鐘，我自己就忙住湊小朋友，好多嘢都不了了之。」

即使離當初喺婚書上簽紙已經差唔多有半個世紀，但唐佳仍然一如往昔，無條件、無限量地向雪妮姐給予愛，雪妮姐就話老公到依家都好就自己：「幾乎每一次有拗撬，佢最後都係讓我，可能佢知道我野蠻嘅、份人脾氣差啲。（佢到依家都係會管接送？）係呀，佢唔放心我自己一個人，我同佢講其實大家都年紀唔細，不如唔使次次都陪我返工咁辛苦，但係佢就話可以陪到我就會繼續陪我，話自己有分數咁樣。」

提到時下年青一輩唔似上一輩嘅香港人，比較傾向合則來不合則去，問雪妮姐點睇？佢就話：「其實冇話邊種啱邊種錯，係依家時代唔同咗，見識多咗，了解嘅嘢唔同咗，鍾意唔鍾意都會表達同行動，以前嘅人唔會諗太多呢種，只會諗生活到有兩餐飯食就OK，比較易滿足。不過我都試過同老公鬧交鬧得好僵，我試過嬲到話要分開，嬲到咩都講，而就會唔出聲、唔激先等我發完癲先同我講嘢。（喺夫妻相處有冇咩可以教下後生一輩？）我冇資格講呢啲，但其實最緊要都係睇清楚、諗清楚嗰啲嘢。」

以下呢啲係雪妮姐喺六十年代嘅相或者電影海報：