張名雅被拒唱$500紙嬲到震：已經唔關唱唔唱錢事，點解態度差到咁

2012年香港小姐冠軍張名雅現已陀B八個月，將於下個月榮升做第二任媽咪。雖然個肚經已籮咁大，但她上個月仲同老公拍拖到泰國享受Babymoon，即使在香港都成日出街周圍去，並無因為要待產而終日困在屋裡。呢日她就同公公去酒樓食飯，但就遇到不快經歷令她嬲到震，係人都知大肚婆唔激得，怕會動到胎氣，究竟是邊個咁大膽激她呢？

張名雅於她的IG story分享了她這次的嬲爆遭遇，大意是講她同公公在酒樓食飯簽卡結帳後，就拿出一張$500紙跟收銀員唱散紙，豈料那個收銀竟然拒絕她，堅持不肯唱錢給她，且擺出一個不屑的樣子拿出一疊$100紙在她面前「揚揚下」表示：「無辦法，你自己出去唱，我有，不過我唔唱畀你哋啊。」令她大感憤怒，非常不滿對方的態度，最後要叫經理出來，該經理就在自己的銀包拿錢出來跟她唱錢，並叫她不要理會那個收銀員。

雖然錢已唱，但張名雅依然好勞氣，因為唱不唱錢不是最大問題，最大問題是那個收銀員的惡劣態度：「個收銀員好似大晒咁，依然喺度大聲呼喝正在理論嘅公公。依家已經唔關唱唔唱錢事，係點解你仲可以態度差到咁，講嘢大聲呼喝人。」最後她嬲到拍枱叫對方立刻道歉，表示要投訴，對方才說：「對唔住囉！！小姐！！」真係激到她扎扎跳，有不少網民都叫她唔好同那個收銀計較，叫她不要動到胎氣。

一齊睇下呢位準索爆媽咪嘅靚相啦。