江美儀傳拒絕加盟《開心速遞》救亡：我邊有咁厲害呀！

無綫劇集《親親我好媽》播出而來都大獲好評，剛過去的星期一播出一集最高收視有31點，平均28點，有咁好嘅成績當然要賀一賀佢啦。今午劇集演員黃智賢、何廣沛及郭子豪就到荃灣為江美儀主持嘅節目《屋邨遊樂團》進行探班。

被網友大讚在劇中飾演虎媽入型入格的江美儀，提到收視咁高，美儀都話係bonus，「現在得到觀眾的認同，都好感激台前幕後嘅功勞。希望觀眾之後都繼續支持我們演員其他作品。」而近日有報導指最新一輯《愛回家》成績麻麻，有意邀請江美儀加入但其實遭其拒絕，她聞言後就指表示未收到劇組邀請，「我邊有咁厲害呀拒絕邀請，我之後要拍《誇世代》，但都是睇公司安排。」咁會否有興趣拍攝處境劇？美儀笑言，「我喜歡去旅行可能未必得，但睇上天安排。」另外，有報導指劇中飾演江美儀細女熊子逸的悲慘身世，對此美儀希望媒體可以高抬貴手，「我知道記者搵到資料會想報導出去，但我覺得一次就夠，她只是小朋友而且不是這個圈子的人，都唔想佢家人再次承受多一次悲傷，這是不好的舉動。」

而最近被網友瘋傳劇中江嘉敏向何廣沛表白的片段，大叫感動，更勾起網友的初戀回憶。何廣沛表示自己都有留意，「好記得當時同時要拍《律政強人》，當時心情只是做好而已，最開心是觀眾覺得我和江嘉敏有火花，這最令我意想不到，因為是我們第一次合作。」提到有網友指《親親我好媽》繼去年《城寨英雄》又一套好劇，何廣沛話好榮幸並笑言，「咁要睇下年尾頒獎禮，但大家到時可能已經淡忘咗。對我黎講有提名已經好好，希望到時可以坐下，見證其他人獲獎。」