【特首選戰．來稿】曾俊華機會只有兩個，就是「渺茫」同埋「無」

見大家睇特首選舉新聞睇得咁開心，本來都唔想潑大家冷水，但其實無論你幾關心又好，或者支持邊個都好，特首選舉嘅結果其實一早出咗，林鄭月娥都九成九會做下一任特首。
剩係睇上面果句，你可能會認為我係「奶粉」寫篇文嚟刷鞋，如果我同你講三個候選人我都唔支持，純粹係根據而家公佈咗嘅資料，計下加減數，去作出依個判斷，你又點睇呢？

文：余未

睇到嘅提名

特首選舉嘅規矩同香港其他選舉有分別，一語道破卻又十分之簡單：邊個拎到六百票以上就贏。「六百票」係每個候選人都逃避唔到嘅門鑑，如果你想成為特首，你唔可以剩係有多過對面嘅選票支持就得，你必需要有半個選委會投票俾你，你先可以順利當選。而最搞笑嘅係，提名候選人果班同選舉投票果班其實係同一班選委，所以睇提名絕對可以觀察到邊個候選人機會較大。

睇番提名分佈，曾俊華有一百六十五個提名，胡國興有一百八十個。而林鄭月娥，就有五百八十個，即係只要提名依班選委晌投票果陣照投番俾佢，佢距離當選就只係差二十一張選票。支持曾俊華嘅朋友可能話，車，咁佢都係未過半，你唔俾剩番果啲都係支持曾俊華嘅暗票咩？

幻想好有美感，但係如果我地睇埋冇提名任何候選人嘅選委資料嘅話，又可以得出更進一步嘅結講。夾埋有二百六十九個選委冇提名任何候選人，屬於商界嘅第一界別同由民主陣營主導嘅第二界別之中冇提名選委人數唔多，而第三界別嘅勞工界有五十五個選委都冇作出提名，第四界別嘅港九區議會更加係全部五十七個選委都冇做提名。

隱藏嘅數字

曾俊華嘅支持者唔好開心住，勞工界同港九區議會加埋近百二個選委都係由工聯會、勞聯、民建聯同經民聯依班建制政黨中人。依四個政黨晌今次選舉有咩取態呢？民建聯兩個副主席、工聯會榮譽會長鄭耀棠加入咗林鄭月娥競選團隊，勞聯副主席譚志聰提名林鄭月娥，經民聯更加係擺明車馬全力支持佢。即係話，依百幾票雖然冇提名林鄭月娥，但晌投票時投俾佢都係走唔甩。

如果加埋勞工界五十五票同港九區議會五十七票，林鄭月娥就有六百九十二票晌手。我當曾俊華拎到剩番所有冇提名選委嘅支持同埋有胡國興過晒啲票俾佢，佢就會有五百零二票，都仲要晌林鄭月娥手上搶到九十九票，先僅僅過到六百零一嘅門鑑。

林鄭月娥依六百九十二票，全部都係來自建制陣營，除非曾俊華能夠晌未來依十幾日作出新嘅承諾，表現得比林鄭月娥更建制，先會令到有近一百個建制選委覺得曾俊華做特首好過林鄭月娥，否則佢都係凍過水。但係最慘係曾俊華而家大部份嘅支持都係來自民主陣營，佢向建制靠攏，又會得失民主票倉，正係左右做人難。

你又可能話，喂上次特首選舉唐英年都係得票少過提名，點解今次唔會先？上次有選票走嚟走去嘅局面出現，係因為北京仲未揀掂，睇番上屆選舉，唐英年晌人大政協界別有三十八個提名，梁振英就有十二個。但係睇番而家，人大政協幾乎一面倒提名林鄭月娥，正係北京屬意林鄭月娥嘅最大訊號。北京落晒指令，一眾建制選委點會有唔跟嘅餘地呢？

晌距離選舉仲有十幾日嘅時間，曾俊華有冇機會晌林鄭月娥手上搶到近一百張選票呢？用著名足球評述員黃興桂先生嘅說話，機會只有兩個，就是「渺茫」同埋「無」。

殘忍嘅真相

好喇，打咗成千字，其實我並唔係諗住「唱衰」曾俊華，我只係根據手上嘅資料，分析得出曾俊華贏面甚低依個結論。咁打依篇文嘅目的，到底係咩呢？

剩番十幾日，傳媒報導都係圍繞特首選舉，大眾討論嘅焦點都係三個候選人。曾俊華係民意調查中得分最高，好多民眾都希望佢當選，向民主派選委做成極大嘅壓力。民主派選委近來嘅表現進退失據，有人希望「造王」，有人跟隨民意，猶如一盤散沙，依種壓力可以話係原因之一。

時事評論員馬嶽教授最近晌訪問中講過，要避免「誤用普選嘅邏輯到特首選舉」。好多民主派支持者對民主派選委寄望甚殷，希望佢地可以用手上嘅一票，令民間屬意嘅候選人當選，但係實情係依個既唔係一個民主選舉，民主派亦都冇能力保送曾俊華上台。如果我地睇番上面嘅分析，我地可以知道決定曾俊華贏定輸嘅關鍵，並不在於民主派選委，而係晌建制選委身上。

計過晒數，知道林鄭月娥當選冇咩懸念，我地係時候面對現實拋棄幻想，思考下晌依場選舉點運用手上嘅選票拎到最大嘅政治籌碼，同埋晌以後嘅五年點樣同「好打得」去做政治角力了。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）